काठमाडौं । पल्सर सहिद स्मारक 'ए' डिभिजन लिग फुटबलको उपविजेता संकटा क्लब आफ्नो अन्तिम लिग खेलमा पराजित भएको छ ।
सोमबार भएको खेलमा उपविजेता क्लब संकटा विभागीय टिम एपीएफ क्लबसंग २ - १ गोल अन्तरले पराजित भएको हो ।
एन्फा कम्प्लेक्स सातदोबाटोमा भएको खेलमा एपीएफलाई जित दिलाउन युवराज खड्का र राजन गुरुङले एक एक गोल गरे । संकटाका लक्ष्मण रुचालले एक गोल फर्काए ।
बल पोजिसनमा संकटाले पकड जमाएपनि एपीएफले पहिलो हाफमै १ - ० को अग्रता बनाएको थियो । खेलको २३ औं मिनेटमा युवराजले काउन्टरमा गोल गर्दै एपीएफलाई १ - ० को अग्रता दिलाएका थिए ।
खेलको ७१ औं मिनेटमा राजनले सुदीप सिख्राकारको फ्रिकिकमा हेड गोल गर्दै एपीएफलाई २ - ० को अग्रता दिलाए । त्यसपछि खेलको इन्जुरी समयमा लक्ष्मणले फ्रिकिकबाट एक गोल गरेपनि संकटाको हार टार्न सकेनन् ।
खेलमा एपीएफका विश्वास उदास म्यान अफ दि म्याच चुनिए ।
यो हारसंगै संकटाले सेलिब्रेसन खेलमा ३ अंक गुमाएको छ । तर, उपविजेता बनेको संकटाले लिगको १३ खेलबाट २८ अंक जोड्न सफल भएको छ ।
जितसंगै एपीएफ शीर्ष पाँचमा अटाएको छ । एपीएफले २३ अंक जोडेर पाँचौ स्थानमा रहेर लिग सकाएको छ ।
