काठमाडौं। मिनेसोटा युनाइटेडले आइतबार इन्टर मियामीमाथि ४–१ को प्रभावशाली जित निकालेको छ।
मिनेसोटा (६ जित, २ हार, ४ बराबरी) ले अघिल्लो खेलमा अस्टिनलाई ३–० ले हराउँदै तीन खेलको जितविहीन यात्रा तोडेको थियो। मिनेसोटाको जितमा बोङ्गोकुले ह्लोङ्गवाने, एन्थोनी मर्कानिच र रोबिन लोडले गोल गरे।
ह्लोङ्गवानेले ३२औं मिनेटमा सिजनको पहिलो गोल गर्दै मिनेसोटालाई १–० को अग्रता दिलाए। कार्लोस हार्भीको पासमा उत्कृष्ट समय मिलाउँदै डिफेन्स पछाडि दौडिएर उनले सिक्स यार्ड बक्सको दायाँ कुनाबाट एक टचमा गोल गरेका थिए। ह्लोङ्गवानेले गत सिजन करिअरकै सर्वाधिक ११ गोल गरेका थिए।
मर्कानिचले पहिलो हाफको इन्जुरी समयमा गोल गर्दै स्कोर २–० बनाए। यो उनको लगातार दोस्रो खेलमा दोस्रो गोल हो र एमएलएस करिअरको तेस्रो। माइकल बक्सालको लामो थ्रो-इनलाई निकोलस रोमेरोले हेडरमार्फत पास गरे। जसलाई मर्कानिचले नजिकैबाट हेडर गर्दै गोलमा परिणत गरे। २१ वर्षीय रोमेरोको यो एमएलएस करिअरको पहिलो असिस्ट हो।
मियामीका लागि लिओनेल मेसीले ४८औं मिनेटमा गोल गर्दै स्कोर २–१ मा झारे। मियामीका मार्सेलो वेगाण्ड्टले ६८औं मिनेटमा आत्मघाती गोल गर्दै मिनेसोटालाई ३–१ को अग्रता दिए। त्यसपछि ७०औं मिनेटमा तानी ओलुवासेयीको पासमा रोबिन लोडले एक टचमा सिजनको पहिलो गोल गर्दै जित सुनिश्चित गरे।
मियामी (६ जित, २ हार, ३ बराबरी) ले अघिल्लो खेलमा न्यूयोर्क रेड बुल्सलाई ४–१ ले हराएको थियो। मियामीले जुन २०२२ मा घरमै भएको पहिलो तथा एकमात्र भेटमा मिनेसोटालाई २–१ ले पराजित गरेको थियो। यस खेलमा लुइस स्वारेज व्यक्तिगत कारणले मैदानमा थिएनन्।
-1746894755.jpeg)
