बार्सिलोनाको ध्यान एल क्लासिको जितमा

काठमाडौं। हान्सी फ्लिकलाई राम्रोसँग थाहा छ– इटालियन क्लब इन्टर मिलानसँग च्याम्पियन्स लिगबाट नाटकीय तरिकाले बाहिरिएपछि बार्सिलोनाका लागि सबैभन्दा क्षतीपूर्ती असुलउपर गर्ने माध्यम भनेकै स्पेनको लिग उपाधि नजिक्याउने एल क्लासिको जित नै हो।

‘इन्टरसँगको खेल सहज थिएन। तर, म अहिले हाम्रो टिमको प्रदर्शनमा सन्तुष्ट छु,’ बार्सिलोनाका जर्मन प्रशिक्षक फ्लिकले शनिबार भने। बार्सिलोना आइतबार साँझ रियल मड्रिडलाई घरेलु मैदानमा आतिथ्य गर्दैछ। यो खेलले ला लिगा उपाधि निणर्यमा ठूलो प्रभाव पार्नेछ।

बार्सिलोना इन्टरविरुद्ध अन्तिम मिनेटसम्म ३–३ को बराबरीमा रहेर अतिरिक्त समयमा खेल फर्किने प्रयास गरिरहेको थियो। तर, अन्तिम क्षणमा इन्टरले गोल गर्दै ४–३ को जित निकाल्यो। अब इन्टरले पेरिस सेन्ट-जर्मेन (पिएसजी)सँग फाइनल खेल्नेछ। बार्सिलोना भने अब आफ्नै देशको डबल उपाधि जित्ने लक्ष्यमा ध्यान केन्द्रित हुनेछ। त्यो पनि रियललाई यो सिजन कुनै मुख्य उपाधिबिना नै छाड्दै।

बार्सिलोना अहिले ला लिगामा रियलभन्दा चार अंकले अघि छ। यस सिजन तीनवटै क्लासिकोमा बार्सिलोनाले जित निकालेको छ, जसमध्ये पछिल्लो जित कोपा डेल रे फाइनलमा निस्किएको हो। फ्लिकको पहिलो सिजनमै क्लासिकोमा ४–४ को अपराजित कीर्तिमान राख्न सक्नु आफ्नै ठूलो उपलब्धि हुनेछ।

‘हामीले इन्टरसँगको खेलपछि छलफल गरिसकेका छौं र आगामी दुई हप्तामा के गर्ने भन्नेबारे पनि योजना बनाएका छौं, फ्लिकले थपे,‘अब चार खेल बाँकी छन् र क्लासिको खेल हाम्रो आत्मविश्वास देखाउने मौका हो।’ फ्लिकका अनुसार लेफ्ट ब्याक एलेजान्ड्रो बाल्डे र स्ट्राइकर रोबर्ट लेवान्डोस्की आइतबारको खेलमा दोस्रो हाफबाट केही मिनेट मैदानमा देखिने छन्।

बायाँ तिघ्राको चोट लागेका कारण बाल्डेले इन्टरविरुद्धको खेल गुमाएका थिए। उनको स्थानमा युवा खेलाडी जेरार्ड मार्टिनले खेलेका थिए, तर डिफेन्समा संघर्ष गरेका थिए। लेवान्डोस्कीले यस सिजन बार्सिलोनाका लागि ४० गोल गरिसकेका छन्। 

दुई साता चोटका कारण बाहिर बसेपछि इन्टरविरुद्ध केही मिनेट मात्र खेलेका थिए। सम्भवत: आइतबारको क्लासिकोमा फेरान टोरेसले सुरुआत गर्नेछन्।