काठमाडौं। स्ट्राइकर रोबर्ट लेवान्डोस्कीले मुख्य प्रशिक्षक मिखाल प्रोबिएर्ज पदमा रहेसम्म पोल्यान्ड राष्ट्रिय टोलीबाट नखेल्ने निर्णय गरेका छन्।
३६ वर्षीय लेवान्डोस्कीले पोल्यान्डका लागि १५८ खेल खेल्दै ८५ गोल गरिसकेका छन्। तर, आइतबार बिहानै उनलाई कप्तानको जिम्मेवारीबाट हटाइएको थियो। अब पिओत्र जिएलिन्स्कीले पोल्यान्डको कप्तानी गर्नेछन्। त्यसै विषयलाई लिएर बार्सिलोनाबाट व्यवसायिक फुटबल खेलिरहेका लेवान्डोस्कीले नखेल्ने निर्णय गरेका हुन्।
‘हालका परिस्थितिबाट प्रशिक्षकप्रति विश्वास गुमेको छ। त्यसैलेउनी प्रशिक्षक पदमा रहेसम्म मैले नखेल्ने निर्णय गरेको छु,’ लेवान्डोस्कीले एक्समा लेखेका छन्। तर, उनले भविष्यमा आफू राष्ट्रिय टोलीमा फर्किने सम्भावना रहेको बताएका छन्।
मिखाल सन् २०२३ देखि पोल्यान्डका प्रशिक्षक छन्। उनले टोलीलाई युरो २०२४ को समूह चरणबाटै बाहिरिएको थियो। आइतबार पोलिस फुटबल संघले आफ्नै वेबसाइटमा लेवान्डोस्कीलाई कप्तानबाट हटाउने प्रशिक्षकको निर्णयबारे जानकारी दिएको थियो।
‘प्रशिक्षक आफैंले रोबर्ट लेवान्डोस्की, सम्पूर्ण टोली र प्राविधिक स्टाफलाई यो निर्णयको जानकारी गराएका छन्,’ संघले भनेको छ।
हाल लेवान्डोस्की पोल्यान्ड टोलीमा छैनन्। पोलिस समाचार एजेन्सी पिएपीका अनुसार उनले विश्रामका लागि टोली छुट्टी मागेका थिए। लेवान्डोस्कीले भर्खरै आफ्नो क्लब बार्सिलोनासँग घरेलु स्पेनिस ट्रेबल (तीन उपाधि) जितेका छन्।
पोल्यान्डले जुन ६ मा मैत्रीपूर्ण खेलमा मोल्डोवालाई २–० ले पराजित गरेको थियो। अब मंगलबार हेलसिंकीमा फिनल्यान्डको सामना गर्दैछन्। यो खेल २०२६ विश्वकप छनोटअन्तर्गत समूह ‘जी’ का लागि हुन लागेको हो।
हालसम्म पोल्यान्ड दुई खेलमा दुई जित हात पार्दै समूहको शीर्ष स्थानमा छ।
-1749465281.jpeg)
