काठमाडौं। ब्राजिलियन सुपरस्टार नेयमारलाई कोरोना संक्रमण भएको छ।
दुई दिनदेखि ज्वरो र रुघाखोकीजस्ता लक्षणका कारण उनी प्रशिक्षणमा अनुपस्थित थिए। सोही बेला गरिएको परीक्षणको रिपोर्ट सकारात्मक आएको हो। नेयमार अहिले घरमै क्वारेन्टाइनमा छन्।
नेयमार बिहीबार र शुक्रबार प्रशिक्षण मैदानमा देखिएका थिएनन्। त्यसले गर्दा आशंका झन् बढेको थियो। त्यसपछि चिकित्सक टोलीले कोरोना परीक्षण गराएको र नतिजा सकारात्मक आएको पुष्टि भएको छ। अहिले उनी पूरै आराम गर्दै चिकित्सकको निगरानीमा छन्।
यो खबरले प्रशिक्षण मात्रै होइन, उनको आगामी खेललाई समेत ठूलो प्रभाव पारेको छ। उनकै नाममा र उनको फाउन्डेसनलाई सहयोगमा भिल्हा बेल्मिरो रंगशालामा आयोजना हुन लागेको च्यारिटी खेल अनिश्चित बनेको छ।
यसअघि नै नेयमार फोर्टालेजाविरुद्धको महत्त्वपूर्ण खेलमा निलम्बित भइसकेका थिए। बोटाफोगोविरुद्धको खेलमा हातले बल समातेपछि रातो कार्ड खाँदै उनी मैदानबाट बाहिरिएका थिए। अब कोरोनाको कारण उनको सान्तोसका लागि सम्भावित अन्तिम खेलसमेत अन्योलमा परेको छ। हाल उनको क्लबसँगको नयाँ सम्झौतासम्बन्धी वार्ता पनि अलमलमा छ।
सान्तोस फर्किएपछि नेयमारको यात्रा भने त्यति सहज रहन सकेको छैन। बारम्बार चोट र फिटनेस समस्याले उनको प्रभाव सीमित बनाएको छ। हालसम्म उनले १२ खेलमा तीन गोल र तीन असिस्ट मात्र गर्न सकेका छन्।
-1749400028.jpeg)
