काठमाडौं। नेदरल्यान्ड्सले आफ्नो विश्वकप छनोट यात्रा सानदार जितसहित सुरु गरेको छ। शनिबार भएको खेलमा मेम्फिस डिपाय र डेन्जेल डुम्फ्रिजका गोलमार्फत फिनल्यान्डमाथि २–० को सहज जित निकालेको हो।
डिपायले खेलको छैटौं मिनेटमै डिफेन्सको गल्तीको फाइदा उठाउँदै नेदरल्यान्ड्सलाई अग्रता दिलाए। त्यसपछि २३औं मिनेटमा कोडी गाक्पोको क्रसलाई डुम्फ्रिजले ब्याक पोस्टबाट उत्कृष्ट फिनिस गर्दै दोस्रो गोल थपे।
यो जितसँगै नेदरल्यान्ड्स ग्रुप ‘जी’ मा ३ अंकसहित तेस्रो स्थानमा पुगेको छ। शीर्ष स्थानको पोल्यान्डले दुई खेलमै जित निकालेको छ भने फिनल्यान्डले ३ खेलबाट ४ अंक जोडेको छ।
डच टोलीले सुरुआतमै गोल गरेर खेललाई आफ्नो नियन्त्रणमा राख्यो। दोस्रो हाफ सहजै पार गर्दै सन् २०१२ पछि पहिलोपटक विश्वकप छनोटको पहिलो खेलमा जित हासिल गर्यो।
‘पहिलो खेल सधैं कठिन हुन्छ,’ कप्तान भर्जिल भ्यान डाइकले भने,‘हामीले ठूलो भागमा खेल नियन्त्रणमा राख्यौं। सम्भवतः ३–० को जित निकाल्न सक्थ्यौं। हामी पहिलो एक घण्टा राम्रो थियौं। अन्तिम ३० मिनेट अझ सुधार गर्न सकिन्थ्यो।’
डिपायले कान काइरिनेनको गलत ‘चेस्ट पास’ मा मौका पाएर बललाई राइट कार्नरमा पठाउँदै गोल गरे। डिपायको यो ४८औं अन्तर्राष्ट्रिय गोल हो। उनी अब रोबिन भ्यान पर्सीको कीर्तिमानभन्दा दुई गोल टाढा छन्।
२३औं मिनेटमा गाक्पोको क्रसलाई डुम्फ्रिजले भलिबाट जाली चुमाउँदै डच टोलीलाई २–० को सुरक्षित अग्रता दिलाए। दोस्रो हाफमा डिपायले अर्को राम्रो अवसरमा गोलकिपर लुकास ह्राडेकीलाई ‘बिट’ गर्न सकेनन्। उता गाक्पोको प्रहार साइड नेटमा लाग्यो। फिनल्यान्डले भने खेलमा फर्किने स्थिति बनाउँदै सकेन।
फिनल्यान्डका लागि गोलकिपर लुकास ह्राडेकीको यो १००औं अन्तर्राष्ट्रिय खेल भए पनि उनले ‘क्लिनसिट’ राख्न सकेनन्।
