काठमाडौं। आइसिसी क्रिकेट विश्वकप लिग २ अन्तर्गत स्कटल्यान्ड भ्रमणमा रहेको नेपालले यसअघिका दुई खेलमा सानदार प्रदर्शन गर्दै शतप्रतिशत जित हासिल गरेको थियो।
अंक तालिकामा अझै पनि नाजुक अवस्थामा रहेको नेपालले शीर्ष ४ मा रहेका घरेलु टोली स्कटल्यान्डमाथि एक विकेटको रोमाञ्चक जित र आफूजस्तै भ्रमणकारी टोली नेदरल्यान्ड्समाथि ५ विकेटको सहज जितसहित नेपालले यो वर्ष सुखद् सुरुआत गर्ने लक्षण देखाएको छ।
हाल १४ खेलबाट १० अंक पुर्याएको नेपाल यो भ्रमणमा कम्तीमा छैटौं स्थानमा उक्लिने लक्ष्यमा हुनेछ। यो लक्ष्य पूरा गर्न नेपालले आइतबार स्कटल्यान्डलाई पुन: एकपल्ट चुनौती प्रस्तुत गर्नेछ। यो खेल नेपाली समयअनुसार अपरान्ह्र ३:४५ बजे सुरु हुनेछ।
स्कटल्यान्ड नेपालभन्दा ४ खेल बढी खेल्दै तालिकामा २२ अंकसहित चौथो स्थानमा कायम छ। नेपालसँग एक विकेटको हार बेहोरे पनि स्कटल्यान्डले यो सिरिजको दोस्रो खेलमा नेदरल्यान्ड्सलाई ४४ रनले पाखा लगाउँदै पुनरागमनको संकेत दिइसकेको छ। फेरि उसले हराएको नेदरल्यान्ड्स उति कमजोर टोली भने होइन।
२२ खेल खेलिसकेको नेदरल्यान्ड्स २६ अंकसहित दोस्रो स्थानमा छ। यता, शीर्ष चारमा रहेका दुई टोलीलाई हराएको नेपाल भने सोही लय कायम राख्दै ह्याट्रिक जित निकाल्ने लक्ष्यमा हुनेछ।
नेपाल र स्कटल्यान्डबीच हालसम्म ९ खेल भएका छन्। तीमध्ये ५ खेलमा नेपाल विजयी हुँदा एक खेल भने नतिजाविहीन सकिएको छ। बाँकी तीन खेलमा भने स्कटल्यान्ड हाबी छ। नेपालले ती भेटमा सबैभन्दा ठूलो हार १७ जुलाई २०२२ मा बेहोरेको थियो।
स्कटल्यान्डको ग्लासगोमा भएको उक्त भेटमा घरेलु टोलीले नेपाललाई ८ विकेटले पराजित गरेको थियो। नेपालले त्यति सानदार जित ननिकाले पनि दुईपल्ट समान ५ विकेटले स्कटल्यान्डलाई पाखा लगाएको छ। सोही वर्ष उक्त स्थानमा भएको पहिलो खेलमा नेपाल ५ विकेटले विजयी भएको थियो।
२९ अक्टोबर २०२४ मा भएको अर्को भेटमा पनि नेपाल ५ विकेटले नै विजयी भएको थियो। डलासमा भएको उक्त भेटयता स्कटल्यान्ड र नेपाल दुईपल्ट आमुन्नेसामुन्ने भएका छन्।
तर, एक खेल रद्द हुँदा अर्को खेलमा नेपालले अन्तिम बलमा एक विकेट हातमा राखेर रोमाञ्चक जित निकालेको छ। त्यो खेल यही सिरिजको नतिजा हो। नेपाल अब यही लयलाई कायम राख्ने योजना छ।
