काठमाडौं। पोर्चुगलका स्टार क्रिस्टियानो रोनाल्डो साउदी क्लब अल–नासर मै रहने पक्का भएको छ।
साउदी प्रो लिगको सिजन सकिएसँगै उनले सामाजिक सञ्जालमा ‘यो अध्याय सकियो’ लेखेका थिए। त्यसयता उनले अल–नासर छाड्न लागेको आशंका चुलिएको थियो। तर, आइतबार राति नेसन्स लिग जितेपछि उनले आफू अल–नासर मै रहने बताएका हुन्।
‘मूलतः केही परिवर्तन हुने छैन। त्यसो भए अल–नासर? हो, पक्कै!, उनले फाइनलपछि सोधिएको प्रश्नमा प्रतिक्रिया दिँदै भने। ४० वर्षीय रोनाल्डो सन् २०२२ मा म्यानचेस्टर युनाइटेडबाट अल–नासर पुगेका थिए। उनको सम्झौता यस समरमा समाप्त हुँदैछ। अर्को महिनादेखि अमेरिकामा क्लब विश्वकपमा सुरु हुँदैछ।
उक्त प्रतियोगितामा सहभागी हुने ३२ क्लबले खेलाडी अनुबन्ध गर्न सक्ने विशेष ट्रान्सफर विन्डो जुन १ देखि १० सम्म खुल्नेछ। अल–नासरको जर्सीमा रहेको आफ्नो फोटोसहित रोनाल्डोले सामाजिक सञ्जालमा लेखेका थिए,‘यो अध्याय सकियो। कथा ? अझै लेखिँदै छ। सबैप्रति आभारी छु।’
रियल मड्रिड र युभेन्ट्सका पूर्वखेलाडीले यो पोस्ट अल–नासरले सिजनको अन्तिम खेलमा अल–फातेहसँग ३–२ ले हार खेपेको केही घण्टापछि गरेका हुन्। उक्त हारसँगै अल–नासरले लिगमा तेस्रो स्थानमा सन्तोष मान्नुपर्यो।
यस सिजन अल–नासरले एसियन च्याम्पियन्स लिग इलाइटको मौका पनि गुमायो। अप्रिलमा जापानको कावासाकी फ्रन्टालेसँग सेमिफाइनलमा पराजित भएपछि क्लब प्रतियोगिताबाट बाहिरिएको थियो।
यद्यपि, रोनाल्डोले व्यक्तिगत रूपमा भने उत्कृष्ट प्रदर्शन गरे। साउदी प्रो लिगमा २४ गोल गर्दै उनले सिजनको सर्वाधिक गोलकर्ता बन्ने उपाधि जितेका थिए। पाँच पटक बालोन डी’ओर जितिसकेका रोनाल्डोले गत वर्ष अल–नासरमै आफ्नो करियरको अन्त्य गर्न चाहेको बताएका थिए। उक्त सन्देशले भने उनी नयाँ यात्राको तयारीमा रहेको संकेत देखिएको थियो।
तर, आफ्नो उमेरको ख्याल राख्दै आफू अल–नासर मै रहने बताएका हुन्। ‘तपाईंहरूलाई थाहा छ, म अहिले कति उमेरको भइसकें। सुरुभन्दा अन्त्यतर्फ बढी नजिक छु। तर, म प्रत्येक क्षणको मज्जा लिन चाहन्छु। यदि गम्भीर चोटपटक परिनँ भने म खेलिरहन्छु,’ उनले भने।
