एजेन्सी । १२ औं संस्करणको विश्वकप क्रिकेट हाल इङ्ल्याण्ड र वेल्समा जारी छ । सहभागी १० टेस्ट राष्ट्र टोली विश्वकपको उपाधि होडमा रहेका छन् ।
विश्वकप इतिहासमा सर्वाधिक सफल राष्ट्रको रुपमा अस्ट्रेलिया रहेको छ । जसले हालसम्म सर्वाधिक ५ पटक उपाधि उचालेको छ ।
भारतले विश्वकप २ पटक उचालेको छ । हरेक संस्करणको विश्वकपमा भारत सधै उपाधि दाबेदारको रुपमा उभिने गरेको छ ।
भौगोलिक हिसाबमा निकै ठुलो देश भारतमा बच्चा जन्मिने वित्तिकै क्रिकेटर बनाउने सपना धेरै अभिभावकले देख्छन् भनेर भन्ने गरिन्छ । घरेलु भुमीमै धेरै प्रतियोगिता हुने भएकाले भारतीय क्रिकेट बोर्ड बीसीसीआईले समेत अन्य देशको फ्रेन्चाईज लिगमा खेलाडीलाई खेल्ने अनुमती दिदैन ।
भारतले आफ्नै भुमिमा खेलाडी उत्पादन गर्छ । हालसम्म उसले कपिल देव, सचिन तेन्दुलकर जस्ता विश्व प्रसिद्व खेलाडी जन्माएको छ ।
हरेक खेलाडीको ईच्छा हुन्छ, आफ्नो राष्ट्रको राष्ट्रिय गान गाएर विश्वकप खेल्ने । तर सबै खेलाडीको सपना पुरा हुँदैन ।
भारतमा ‘एक से स्टार’ खेलाडी रहेका कारण कतिपय नाम चलेका खेलाडीले समेत विश्वकप खेल्न पाएका हुँदैनन् । हामीले विश्वकप खेल्न नपाएका भारतका ४ स्टार खेलाडीको सुची तयार पारेका छौं ।
भीभीएस लक्ष्मण
सय टेष्ट खेलेर विश्वकप खेल्न नपाउने खेलाडीमा अस्ट्रेलियाका जस्टिन लेङ्गरसंगै भारतका भीभीएस लक्ष्मणको समेत नाम आउछ । उनले ८६ एक दिवसीय खेल खेल्दै २ हजार ३ सय ३८ रन बनाएका छन् ।
भारतका लिजेण्ड मानिने लक्ष्मणले सन् २००३ को विश्वकपको टोली समावेश थिए । तर उनले कुनैपनि खेलमा मैदानमा उत्रन पाएनन् । सन् १९९९ र सन् २००७ को टोलीमा समेत लक्ष्मण अटाउन सकेनन् । उनको विश्वकप खेल्ने सपना अधुरै रहन पुगेको थियो ।
इशान्त शर्मा
भारतका तिब्र गतिका भेट्रान बलर इशान्त टेस्ट खेलका नियमित खेलाडी हुन् । तर जब एक दिवसीय र टी ट्वान्टीको कुरा आउँछ, उनलाई अन्य खेलाडीले पछि पार्दै आएका छन् ।
उनले ८० एक दिवसीय खेलमा १ सय १५ विकेट हात पारेका छन् । डेथ ओभरमा ब्याट्सम्यानले उनको बलमा थुप्रै रन बनाउने गरेका छन् ।
इशान्त सन् २०११ को विश्वकप टोलीमा अटाएका थिएनन् । सन् २०१५ को विश्वकपमा चोटका कारण उनीले प्रतियोगिता गुमाएका थिए । इशान्त लामो समयदेखि एक दिवसीय राष्ट्रिय टोलीबाट बाहिर रहेका छन् ।
अम्बाती रायडु
अम्बाती रायडुले अन्तराष्ट्रिय एक दिवसीय खेलमा सन् २०१३ मा डेब्यु गरेका थिए । अन्य खेलाडी जस्तै रायडुले खेलमा स्थिर प्रर्दशन गर्न नसक्दा राष्ट्रिय टोलीबाट कहिले भित्र त कहिले बाहिर रहदै आएका छन् ।
रायडु सन् २०१५ विश्वकप टिममा रहेपनि कुनैपनि खेल खेल्न पाएनन् । चालु विश्वकपमा रायडु चौथो स्थानमा अटाएका थिए । तर छनोट समितिले अन्तिम समयमा उनको स्थानमा विजय शंकरलाई टिममा समावेश गरेको थियो ।
अमित मिश्रा
सन् २०१० देखि अभागी खेलाडीको रुपमा हेरिएका खेलाडी हुन्, अमित मिश्रा । उत्कृष्ट बलिङ शैली रहेको मिश्रालाई उनी भन्दा सिनियर दुई खेलाडीले छायाँमा पारेका थिए ।
सन् २०११ को विश्वकपमा मिश्राले मौका पाउने देखिए पनि अनुभबी रविचन्द्रन आश्विन र हरभजन सिंहले पछाडी पारेका थिए । चालु विश्वकपमा कुलदिप जाधब र युजभेन्द्र चाहालको जोडीले अन्य खेलाडीलाई पछि पार्दै आएका छन् ।
