काठमाडौं । प्रधानमन्त्री कप एकदिवसीय राष्ट्रिय क्रिकेट प्रतियोगिता चौथो दिन आज कीर्तिपुर मैदानमा अन्य दिनको भन्दा फरक माहोल देखियो ।
बन्दको हल्लाका कारण सार्वजनिक साधन कम चलेका थिए, तर प्रतियोगिता हेर्न त्रिवि मैदान पुग्ने दर्शकको उपस्थिती भने अन्य दिनको तुलनामा धेरै देखिन्थ्यो ।
मैदानमा विभागीय टिम एपीएफ र सुदुरपश्चिम प्रदेश थिए । दर्शकको समर्थन सुदुरपश्चिमलाई थियो ।
खेलमा एक हिसावमा रन कम बन्यो । टस जितेर पहिले ब्याटिङ गरेको सुदुरपश्चिम १ सय २५ रनमा रोक्कियो ।
अनुभबी खेलाडीको कमी रहेको सुदुरपश्चिमका ५ खेलाडी रन आउट हुन पुगे ।
सुदुरपश्चिमका युवा कप्तान शेर मल्ल कम स्कोर बनेका कारण केही निराश देखिए ।
सुदुरपश्चिमका समर्थक भने उपाधि दाबेदार टोली एपीएफसंग ठुलो अन्तरको हार ब्यहोरिने चिन्तामा थिए ।
तर ठिक विपरित एपीएफका खेलाडीले सोचे अनुरूप मैदानमा रन बनाउन सकेनन् । खेल निकै रोमान्चक बन्दै गएको थियो । एपीएफका खेलाडी मैदानमा टिक्न संघर्ष गर्दै थिए ।
१ सय २६ रनको सामान्य लक्ष्य पुरा गर्न एपीएफ जस्तो अनुभवी टिमले ७ विकेट खर्चन पर्यो ।
अनुभबी खेलाडीले भरिएको एपीएफका खेलाडीलाई सुदुरपश्चिमका बलरले खुलेर खेल्न दिएनन् ।
दुई महत्वपूर्ण क्याच छुटाउनु र थुप्रै पटक फिल्डिङमा चुकेका कारण खेल हार्न पुगेको युवा कप्तान मल्लले बताए ।
‘सुरुमा कम स्कोर देखेर नरमाइलो लागेको थियो । तर हामीले जसरी खेल अन्त्य गर्यौं, त्यसबाट सन्तुष्ट छु ।’ मल्लले खेलपाटीसंग बताए ।
पीएम कपका लागि काठमाडौँ आएको २४ घण्टा नबित्दै मैदान उत्रेका खेलाडीले आज गरेको प्रदर्शन प्रशंसा गर्न लायकनै थियाे ।
पहिलो पटक प्रदेशको कप्तानी गरेका मल्ल भने जस्तो सुकै परिस्तिथीलाई आत्मसाथ गर्न आफु तयार रहेको बताए ।
‘मेरो लागि कप्तानी गर्नु चुनौती थियो । मैले यसलाई अवसरको रुपमा लिएको छु ।’ मल्लले थपे ।
‘हाम्रो टिममा धेरै नया खेलाडी छन् । त्यसैले फिल्डिङमा कमजोरी देखियो ।’ मल्ल भन्छन्, ‘हाम्रो क्याम्प पनि भएको थिएन । जसको असर मैदानमा देखियो । तालमेल नमिल्दा ५ खेलाडी रन आउट भए ।’
पिचले ब्याटिङलाई सहयोग गरे पनि आफ्नो बलर राम्रो भएका कारण एपीएफका खेलाडी खुलेर खेल्न नसकेको उनको दाबी थियो ।
दर्शकको पुर्ण समर्थन पाएको सुदुरपश्चिमले छिटो छिटो विकेट हात पार्दा एक समय कीर्तिपुरको क्रिकेट मैदान गुञ्जयमान बन्न पुगेको थियो ।
यद्दपी खेलाडीले समर्थकलाई खुसी बनाउन सकेनन् । समर्थकले प्याराफिटबाटै फिल्डिङमा सुधार गर्नु पर्ने भन्दै सुझाब दिएका थिए ।
पीएम कपमा आफ्नो प्रदेशलाई क्रिकेटको सहरको रुपमा चिनाउने लक्ष्य लिएर काठमाडाै आएको कप्तान मल्लले बताए ।
‘हामी आफुलाई प्रमाणित गर्ने कोसिस गर्ने छौं ।’ उनले थपे ।
‘आजको गल्ती सुधार गर्दै आउने तीन खेलमा जित निकाल्ने र अघिल्लो चरण पुग्ने योजना छ ।’ उनले थपे ।
एपीएफका ब्याट्सम्यानलाई दबाबमा राख्न उनले बलिङ रणनीति परिवर्तन गरेका थिए । खेलाडीको कमजोरी निकाल्दै नयाँ बलरलाई उनले मौका लिएका थिए । एक हिसावको गज्जबको आत्मविश्वास उनले एपीएफको खेलविरुद्व देखाएका थिए ।
को हुन् शेर मल्ल ?
गत बर्ष भएको दोस्रो संस्करणको पीएम कपमा सुदुरपश्चिमको खेलाडीको रुपमा उनले उत्कृष्ट प्रदर्शन गरेका थिए । पहिलो खेल कर्णालीबिरुद्द ७ ओभर २ बलमा ५ विकेट हात पार्दै उनले सुदुरपश्चिमलाई जित दिलाएका थिए ।
प्रतियोगितामा ३ खेलमा बलिङ गरेका उनले ११ विकेट हात पारेका थिए । उनी २ खेलमा म्यान अफ दी म्याच घोषित भएका थिए ।
आज ९ ओभर बलिङ गरेका उनले १ मेडन राख्दै ३३ रन खर्चेर २ विकेट हात पारेका थिए । अल राउण्डर खेलाडीको रुपमा उनले ब्याटिङतर्फ ११ रन जोडेका थिए ।
केहि महिना अघि भएको यु–१९ विश्वकप छनोट खेल अघि अभ्यास खेल्न भारतको आन्द्र प्रदेश गएको १८ सदस्यीय टोलीमा उनले स्थान बनाएका थिए ।
भ्रमणकारी टाेलीबाट दुई खेलमा औसत प्रर्दशन गरेका उनी नेपालको अन्तिम १४ सदस्यीय टिममा स्थान बनाउन असफल रहे ।
