काठमाडौं। रियल मड्रिडले यस सिजनको पहिलो ट्रान्सफरमा स्पेनका उदीयमान डिफेन्डर डिन हुयसेनलाई अनुबन्ध गरेको छ।
स्पेनिस जायन्ट रियलले शनिबार २० वर्षीय हुयसेनसँग सन् २०३० को जुनसम्मको पाँचवर्षे सम्झौता भएको बताएको हो। रियलले उनलाई इङ्लिस क्लब बर्नमाउथबाट भित्र्याउन ५० मिलियन पाउन्ड (करिब ६६.४ मिलियन अमेरिकी डलर) को रिलिज क्लज तिरेको छ।
नेदरल्यान्ड्समा जन्मिएका हुयसेन बलसँग खेल्न सक्ने आधुनिक सेन्टर ब्याक हुन्। उनी गत सिजन युभेन्ट्सबाट बर्नमाउथमा करिब १२.५ मिलियन पाउन्डमा आएका थिए। नोभेम्बरदेखि नियमित रूपमा टोलीमा स्थान बनाउन सफल भएका थिए।
बर्नमाउथमा देखाएको प्रभावशाली प्रदर्शनकै कारण उनलाई स्पेनको राष्ट्रिय टोलीमा मार्च महिनामा युरोपियन नेसन्स लिग प्लेअफका लागि बोलाइएको थियो।
उनले नेदरल्यान्ड्सविरुद्ध पहिलो खेलमा विकल्पको रूपमा मैदान उत्रे भने दोस्रो लेगमा सुरुआती ११ मा स्थान पाए।
बलमा विश्वस्त र खेल बुझ्ने क्षमतायुक्त हुयसेन पछिल्ला महिनामा लिभरपुल, आर्सनललगायतका ठूला प्रिमियर लिग क्लबको रडारमा थिए। त्यसैले बर्नमाउथले उनलाई गुमाउने लगभग निश्चितजस्तै थियो। यद्यपि, क्लबले राम्रो मुनाफा भने कमाएको छ।
ट्रफीविहीन २०२४–२५ सिजनमा डिफेन्स लाइनका धेरै खेलाडी घाइते हुँदा रियल नयाँ र बलियो रक्षा लाइन बनाउने प्रक्रियामा लागेको छ। हुयसेन त्यस अभियानको पहिलो महत्त्वपूर्ण नाम बनेका छन्।
