हाउन्ड्सको अपराजित यात्रामा गोल्डेनगेटको ब्रेक

काठमाडौं। गोल्डेनगेट बास्केटबल क्लबले हिमालयन जाभा बास्केटबल लिग (एचजेबिएल) मा हाउन्ड्स एकेडेमीको अपराजित यात्रामा ब्रेक लगाएको छ। 

लिगअन्तर्गत शनिबार भएको रोमाञ्चक खेलमा गोल्डेनगेटले हाउन्ड्सलाई ७९–७५ ले पराजित गरेको हो। कीर्तिपुर कभर्डहलमा भएको निकै प्रतिस्पर्धात्मक खेलमा हाउन्ड्सले पहिलो क्वाटर आफ्नो पक्षमा पारे पनि त्यसपछि गोल्डेनगेटले खेलमा पुनरागमन गरेको थियो। 

हाउन्ड्सले पहिलो क्वाटरमा २०–१६ को अग्रता लिएको थियो। दोस्रो क्वाटरमा गोल्डेनगेटले पुनरागमन गर्दै २५–२१ ले आफ्नो पक्षमा पारेपछि हाफ टाइममा ४१–४१ को बराबरी भएको थियो। 

तेस्रो क्वाटरमा हाउन्ड्सले १९–१८ ले आफ्नो पक्षमा पार्दै १ अंकको झिनो अग्रता बनाएको थियो। तर चौथो तथा निर्णायक क्वाटर २०–१५ ले आफ्नो पक्षमा पारेपछि गोल्डेनगेटले रोमाञ्चक जित हात पारेको हो। 

गोल्डेनगेटका लागि अभिषेक सिंहले २४ अंक स्कोर गरे। अभिषेक सिंह मोस्ट भ्यालुएबल प्लेयर घोषित भए। यस्तै, हाउन्ड्सका लागि विजय बुर्जाले सर्वाधिक २५ अंक स्कोर गरे।

लिगमा गोल्डेनगेटको यो तेस्रो जित हो। चार खेलमा ३ जित र १ हारबाट ७ अंक जोडेको छ। हाउन्ड्सको पनि पहिलो हारपछि चार खेलबाट समान ७ अंक नै छ। लिगअन्तर्गत शनिवारै भएको पहिलो खेलमा टाइम्स बास्केटबल क्लबले कीर्तिपुर क्लबलाई ७६–७२ ले पराजित गरेको छ। 

तीन क्वाटर टाइम्सले आफ्नो पक्षमा पारेको थियो। चौथो क्वाटरमा पुनरागमन गर्दै खेलमा फर्कने प्रयास गरेको कीर्तिपुरले अन्तिम समयमा टाइम्सलाई रोक्न सकेन।  टाइम्सले सुरुआती तीन क्वाटर २१–१९, २५–२१, १८–१२ ले आफ्नो पक्षमा पारेको थियो। 

कीर्तिपुरले चौथो क्वाटर २०–१२ ले आफ्नो पक्षमा पारेको थियो। टाइम्सका लागि कप्तान सदिश प्रधानले २२ अंक स्कोर गरे। उनी खेलको मोस्ट भ्यालुएबल प्लेयर घोषित भए। कीर्तिपुरका लागि सयुन राईले सर्वाधिक २३ अंक स्कोर गरे। 

लिगमा टाइम्सको यो दोस्रो जित हो। चार खेलमा २ जित र २ हारबाट टाइम्सको ६ अंक भएको छ। सुरुआती दुई खेल जितेको कीर्तिपुरको यो लगातार दोस्रो हार हो। कीर्तिपुरको पनि समान ६ अंक नै छ।