काठमाडौं । टिभिएस एभरेष्ट प्रिमियर लिग (ईपीएल) टी–ट्वान्टी क्रिकेटबाट बाहिरिएपछि चितवन टाइगर्सका कप्तान पृथु बास्कोटाले अम्पायरको निर्णयमा असन्तुष्ट व्यक्त गरेका छन् ।
टियु क्रिकेट मैदानमा बुधबार भएको इलिमिनेटर खेलमा भैरहवा ग्लाडीयटर्ससंग ४ विकेटले पराजित हुँदै चितवन प्रतियोगिताबाट बाहिरिएको थियो ।
खेलपछि पोस्ट म्याच कन्फरेन्समा बोल्दै पृथुले प्रतियोगिता दौरान अम्पायरहरुको निर्णयमा खुसी हुन नसकेको बताए ।
'समग्र प्रतियोगिता राम्रै भयो । तर, म एम्पायरको निर्णयप्रति भने सन्तुष्ट छैन्,' कप्तान पृथुले भने, 'तर, म एउटा जिम्मेवार खेलाडी हु मैले एम्पायरको निर्णय मान्नु पर्ने हुन्छ ।'
यस्तै कप्तान पृथुले आफुले प्रतियोगितामा आफ्नो जिम्मेवारी राम्रोसंग निभाएको बताए । उनले चितवनले सबै खेलमा प्रतिद्वन्द्वीलाई कठिन चुनौती दिएको समेत बताए ।
'मैले मेरो टोलीको जिम्मेवारी राम्रो तरिकाले निभाएको हो । तर, टिमलाई जिताउन सकिएन,' कप्तान पृथुले भने।
यस्तै भैरहवाका कप्तान शरद भेषावकरले टिम उपाधि नजिक पुगेको बताउदै क्वालिफायर खेलमा बलियो भएर प्रस्तुत हुने बताए ।
'भोलिको खेल बारेमा केहि सोचेको छैन् । तर, भोलिको खेलमा अन्य बेलाभन्दा केहि बलियो भएर आउनुपर्छ,' कप्तान शरदले भने ।
भैरहवाले बिहिबार हुने दोस्रो क्वालिफायरमा काठमाडौं किङस इलाभेनसंग खेल्दैछ ।
त्यस्तै शरदले चितवनविरुद्ध प्रदिप ऐरी र अन्तिम ओभरको ब्याटिङले टोलीको जित भएको बताए ।
उनले भने 'आज प्रदिपले जुन तरिकाको खेल खेले त्यो नै आजको खेलको सबै भन्दा राम्रो कुरा हो । उनको उत्कृष्ट खेलले हामीलाई सहज भयो । आजको खेलबाट म खुसी छु।'
-1746894755.jpeg)
