सम्झनामा ललित – सबैको स्विकार्य व्यक्तित्व !

काठमाडौं । ललितसंग भेट फुटबलकै माध्यमबाट भएको हो । मैले उसलाई एन्फामै चिनेको हो । खेलाडीको रुपमा धेरै याद गरेको थिएन । एन्फामै आएपछि सहकार्य गरेको हो । ललित मेरा लागि भाई जस्तो मान्छे थियो । फुटबलमा धेरै सहकार्य पनि गरियो । ललित सधै फुटबल प्रति समर्पित, अनुशासित र मिलनशाल ब्यक्तित्व रह्यो । एन्फा एकेडेमी बनाएपछि उसले धेरै काम गरेको छ ।

क्लबलाई ब्यवसायीक बनाउन ललितको ठुलो योगदान छ । क्लबलाई व्यवसायीक बनाउने कामको सुरुवात उसैले गरेको हो । क्लबमा प्रायोजक खोज्ने कामको सुरुवात उसैले गरेको हो । उमेर समूहको फुटबलमा उसको धेरै झुकाब देखिन्थ्यो ।

७० सालको एन्फा चुनावमा उपाध्यक्षमा उम्मेदवारी दिएको थिए । ललित समेत प्रत्यासी थियो । अन्तिममा हामीले उसको नेतृत्व स्विकार गर्यौ । उपाध्यक्षमा उम्मेदवारी फिर्ता लिएर उसलाई सहयोग गर्यौ । उसले फुटबलमा केही गर्छ भन्नेनै थियो । सर्वसम्मत रुपमा नेतृत्व चयन हुन पुग्यो ।

७२ सालको भुकम्प गएको समय म केही महिना एन्फा गएको थिएन । ललित एन्फाको कार्यवहाक अध्यक्ष थियो । त्यही समय उसको दुर्घटना हुन पुग्यो । घटना धेरै अकल्पनीय थियो । समय पनि कति चाँडै जाने रहेछ । उसले छाडेर गएको समेत ५ बर्ष बितिसकेछ । ललितको निधनले फुटबललाई धेरैनै क्षति भएको छ ।

ललित भर्खरै एन्फाको नेतृत्वमा पुगेको थियो । सबैको आदरणीय थियो । पदमा पुगेर सबै आदरणीय हुदैनन्, तर ललितमा विशेष गुण थियो । फुटबलमा समर्पित, मिलनसार, ठुलालाई ईज्जत गर्ने, भनेको कुरा नकाट्ने, मिडियासंग राम्रो सम्बन्ध बनाएको, उ सबैको स्विकार्य थियो ।

फुटबलमा सधै केही न केही विवाद भैरहन्थ्यो । गणेश थापाको पालमा नेपाल फुटबल संघ गठन हुँदा मलाई र ललितलाई ठुलो दबाब आएको थियो । तर हामीले राम्रो काममा लाग्न पर्छ भनेर कतै गएनौ । कहिल्यै साथ छोडेनौ । पछि सम्म धेरै कुरा आए, दबाब थेगेरै अघि बढ्यौ ।

ललितको त्यही आत्मविश्वास आजको दिनमा समेत सम्झिन्छु । उसमा आत्मविश्वासको कमि कहिल्यै देखिन । गर्छु भन्ने अठोट लिएर काम गर्ने खालका थियो । काम गर्न सजिलो थियो । सम्झाउन सकिने र सम्झिन सक्ने मान्छे थियो ।

ललितले छाडेर गएपछि एन्फा नेतृत्वमा म आए । युवा फुटबलमा ललितको समर्पण देखेरै हामीले यू–१८ फुटबल च्याम्पियनसिप सुरु गर्यौ । जो नियमित भईरहेको छ । कोरोनाले यस पटक प्रभावित बनाउने देखिएको छ । एन्फासंग बिनम्र अनुरोध गर्छु, अवस्था सामान्य हुने बित्तिकै प्रतियोगिता सञ्चालनमा ध्यान पुर्याईयोस ।

बितेर गएपछि धेरै कुरा आउँछन् । तर ललितको ब्यक्तित्व उच्च थियो ।

संगै हुदाँ धेरै क्षण बिताईयो । तिता मिठा अनुभव गरियो । धेरै काम गरियो । बर्षमा ३ सय बढी दिन रंगशालामा बिताईयो । ललित फुटबलका लागि गर्ने मान्छे थियो । उसले क्लब फुटबलमा गरेर देखायो । क्लबलाई प्रायोजकसंग जोडेर फुटबललाई ब्यवसायीकरण गर्न ललितले धेरै मेहनत गरेको छ । उसको कामबाट अरु क्लबहरुले प्रेरणा लिए । क्लबहरु बिस्तारै ब्यवसायीकरणको बाटोमा अग्रसर भए । ललित त रहेन, तर नेपाली फुटबलले सधै उसलाई सम्झिरहनेछ ।

(एन्फाका तत्कालिन कार्यबहाक अध्यक्ष ललितकृष्ण श्रेष्ठको पाँचौ स्मृति दिवसका अवसरमा पूर्व अध्यक्ष नरेन्द्र श्रेष्ठसंग गरेको कुराकानीका आधारमा ।)