प्रधानमन्त्री कप भलिबल लिग अब बैशाखमा

काठमाडौं। प्रधानमन्त्री कप एनभीए महिला तथा पुरुष भलिबल लिग निर्धारित मितिमा नहुने भएको छ।

नेपाल भलिबल संघले एक सूचना जारी गर्दै प्राविधिक कारणवश प्रतियोगिता सारिएको जानकारी दिएको हो।

यसअघि त्रिपुरेश्वरस्थित राष्ट्रिय खेलकुद परिषद्को कभर्ड हलमा १९ देखि २८ चैतसम्म लिग सञ्चालन गर्ने तयारी गरिएको थियोे। तर, संघले उक्त लिग अब नयाँ मिति अनुसार हुने जनाइएको हो। संघले नयाँ मिति र तालिका सम्बन्धित क्लबलाई जानकारी गराइसकिएको जनाएको छ।

पत्रअनुसार प्रतियोगिता अब १ देखि १९ बैशाख २०८३ सम्म सञ्चालन हुने तय भएको छ। स्थान भने यथावत् त्रिपुरेश्वरस्थित कभर्ड हल नै रहनेछ।