काठमाडौं । सन् २०१७ को सेप्टेम्बरमा भुटानमा आयोजना भएको साफ यू-१८ फुटबल च्याम्पियनसिपको उपाधि नेपालले जितेको थियो ।
थिम्पुमा भएको च्याम्पियनसिपमा नेपाल लगातार दोस्रो पटक च्याम्पियन बनेको थियो ।
दोस्रो पटक च्याम्पियन बनेपछि अखिल नेपाल फुटबल संघ (एन्फा) ले खेलाडीलाई नगदसहित पुरस्कारको घोषणा गरेको थियो ।
तर, च्याम्पियनसिप सकिएको ३ वर्ष पुग्नै लाग्दा समेत खेलाडीले तोकिएको पुरस्कार पाउन सकेका छैनन् ।
लामो समय तोकिएको पुरस्कार नपाएपछि खेलाडीहरु एन्फालाई प्रश्न गर्न थालेका छन् ।
‘आशा गर्दा गर्दा १७ को पुरस्कार २० सम्म आईपुगिसक्यो । त्यसको अत्तोपत्तो छैन । अब कस्लाई के भन्नु ?’ उक्त साफ जित्दाका कप्तान तथा गोलरक्षक अर्पण कार्कीले खेलापाटीसँग भने ।
उपाधि जितेपछि नरेन्द्र श्रेष्ठको अध्यक्षमा रहेको एन्फाको कार्यसमितिले विजेता खेलाडीलाई २ लाख सहित पुरस्कृत गर्ने घोषणा गरेको थियो । तर, एन्फा नेतृत्व सम्हाल्न आईपुगेका कर्मा छिरिङ शेर्पाको कार्यसमितिले बेवास्ता गर्दा खेलाडीले पुरस्कार पाउन सकेका छैनन् ।
शेर्पाको नेतृत्वमा रहेको कार्यसमितिले समेत खेलाडीको पैसा दिने बताउँदै आएको छ । तर, त्यो भाषणमै सिमित बनेको छ ।
यस अघि एन्फाले मंसिरमा आयोजना भएको १३ औं दक्षिण एसियाली खेलकुद (साग) अघिनै पुरस्कार दिने भनेर खेलाडीलाई लोभ देखाएको थियो ।
‘साग अघि नै पैसा दिन्छौं भनिएको थियो । दिन्छु भन्ने मात्रै तर नदिने एन्फाको प्रबृति भयो । म्याच जितेपछि पनि पैसा नपाउँनुको कारण चहि के हो,’ च्याम्पियन टिमका एक सदस्यले भने ।
‘बरु हामीलाई पैसा नदिनुको कारण एन्फाले बताईदिए हुन्छ । कि दिदैनौं भन्नु । कि दिनु । यसरी हामीलाई आशा देखिएर मन मात्रै पोल्छ । फकाएर सधै राखेर हुन्छ र ? अरुलाई दिने हामीलाई नदिने केहि कारण त होला ?,’ उनी प्रश्न गर्छन् ।
छिरिङ लोप्साङ साफ जित्दा टिमको प्रशिक्षक थिए । उनी एन्फा प्रदेश कमिटि-३ का प्रशिक्षक रहेका छन् ।
टिमको व्यवस्थापकमा तत्कालिन एन्फा सदस्य गणेश बहादुर चन्द थिए । चन्द अहिले एन्फाको कार्यसमितिमा छैनन् ।
तत्कालिन समय एन्फाको कार्यसमितले पुरस्कार दिने निर्णय गरेको तर नयाँ आएको कार्यसमितिले बेवास्ता गर्दा खेलाडीले घोषित पुरस्कार रकम नपाएको चन्द बताउँछन् ।
‘तत्कालिन कार्यसमितिबाट पुरस्कार बापत २ लाख दिने घोषणा भएको हो । पैसा नहुँदा केहि समयपछि दिने कुरा पनि भएको थियो । पछि माहोल चुनावमय भयो । नयाँ टिम आयो । तर पहलनै भएन,’ चन्द भन्छन् ।
चन्दले विराटनगरमा भएको साधारण सभामा समेत खेलाडीले पैसा पाउनुपर्ने माग राखेका थिए । पछि सबै तहका खेलाडीलाई एन्फाले पुरस्कार दिएपनि यस टिमलाई भने पुरस्कृत गरेन् ।
‘बैशाखमा दिनुपर्ने हो । खेलाडीले समेत तपाईको कारण नदिएको भन्छन् । पहलनै गरिनस् भन्छन् । मैले के भन्नु सधै,’ चन्दले थपे ।
यस अघि एन्फाले गत असोजमा विभिन्न विधाका उमेर समूहका खेलाडीलाई नगद पुरस्कार हस्तान्तरण गरेको थियो । एन्फाले भारतमा भएको यू–१५ साफ उपविजेता टिमका खेलाडीलाई जनही २५ हजार र साफ–१८ फुटबलमा समूह चरणबाटै बाहिरिने टिमका प्रत्येक सदस्यलाई १० हजार दिएको थियो ।
यस्तै एन्फाले किर्गीस्तानमा भएको नादेझ्दा कपमा उपविजेता महिला टिमलाई ५० हजार र विश्वकप छनोटमा चाईनिज ताईपेलाई पराजित गर्ने प्रत्येक सदस्यलाई जनही २५ हजार दिएको थियो । तर त्यस समय पनि एन्फाले यू–१८ साफ विजेता टिमलाई बेवास्ता गर्यो ।
एन्फा महासचिव इन्द्रमान तुलाधरले पुरानो कार्यसमितिको निर्णय भएका कारण केहि ढिला भएको र बैशाखमा दिने निर्णय कार्यसमितिबाट भएको तर कोरोनाको कारण प्रभावित भएको बताए ।
‘एन्फा डे (आईतबार) मा दिने निर्णय कार्यसमितिले गरिसकेको छ । कोरोनाको कारण एन्फा डे समेत प्रभावित भएको छ । महामारी सामान्य अवस्थामा आएपछि हुने कार्यक्रममा दिनेछौं,’ महासचिव तुलाधरले भने ।
महासचिव तुलाधरले यू-१८ च्याम्पियन पुरुष टिमको २ लाख र १३ औं साग विजेता पुरुष खेलाडीलाई दिने भनिएको ५ लाख ५० हजार सँगै दिने समेत बताए ।
‘यस अघि आन्तरिक स्रोत नजुटेकालेनै खेलाडीले पुरस्कार रकम नपाएका हुन् । अब सो स्रोत पुरा भएको छ,’ तुलाधरले थपे ।
कोरोनाको कारण सरकारले लकडाउन गरेसँगै एन्फाको दिवस प्रभावित बनेको हो । तर, खेलाडीहरु भने लडडाउनको समयमा एन्फाले आफ्नो खातामा पैसा हाल्दिएमा आफुहरुलाई राहत मिल्ने बताउँछन् ।
‘लकडाउनको समय त्यो पैसा पाए धेरै सहयोग हुन्थ्यो । एन्फाले बेलैमा खेलाडीको हितमा निर्णय लिए हुन्थ्यो,’ च्याम्पियन टोलीका एक खेलाडी भन्छन् ।
