काठमाडौं । मछिन्द्र फुटबल क्लबबाट ए डिभिजन लिग खेलेका मिडफिल्डर विशाल राई र डिफेन्डर रन्जित धिमाल न्युरोड टिम (एनआरटी) मा अनुबन्धित भएका छन् ।
मलेसियामा हुने टुवान याङ टेरुतमा (टीवाईटी) कप फुटबल प्रतियोगिताको तयारीमा रहेको एनआरटीले विशाल र रन्जितलाई अनुबन्ध गरेको जनाएको छ ।
एनआरटीले डिफेन्डर छिरिङ गुरुङ, मिडफिल्डर गौरव श्रेष्ठ र अट्याकीङ रुमेश बर्तौलालाई समेत अनुबन्ध गरेको छ ।
त्यस्तै एनआरटीले संकटाबाट ए लिग खेलका मिडफिल्डर सुवास गुरुङ, थ्री स्टारबाट खेलेका सन्जोक राईलाई अनुबन्ध गरिएको जनाएको छ ।
एनआरटीले जावलाखेलबाट ए लिग खेलेका भारतीय मिडफिल्डर निकालोस फर्नान्डेज र क्यामरुनका गोलकिपर टोलो ल्यान्ड्रीलाई समेत अनुबन्ध गरेको छ ।
टीवाईटी कपमा एनआरटीले मलेसियाको सुपर लिग क्लब पेनाङ एफसी र इन्डोनेसियाको लिग टु क्लब कारो एफसीसँग प्रतिस्पर्धा गर्नेछ ।
प्रतियोगिता अन्तर्गत एनआरटीले ३० जुनमा कारो एफसी र २ जुलाईमा पेनाङ एफसीसँग प्रतिस्पर्धा गर्ने छ । लिगको अंकको आधारमा विजेता र उपविजेता टोलिको टुङ्गो लाग्ने छ। ।
प्रतियोगिता पेनाङका शहर प्रमुख मिस्टर याङले पद बहाली ग्रहण गरेको पहिलो बार्षिकोत्सवको अवसरमा आयोजना हुन लागेको हो । प्रतियोगिता२८ जुनदेखी २ जुलाईसम्म हुनेछ ।
२० हजार दर्शक क्षमता भएको पेनाङ सिटी रंगशालामा हुने प्रतियोगिताको विजेताले १० हजार मलेसियन रिङगेट पुरस्कार जित्नेछ । उपविजेता टोलीले ५ हजार मलेसियन रिङगेट पुरस्कार जित्नेछ ।
सहीद स्मारक ‘ए’ डिभिजन लिगको तयारी स्वरुप एनआरटीले ‘प्री सिजन’ खेलका लागि मलेसिया भ्रमण गर्न लागेको हो ।
यस्तै एनआरटीले थाईल्याण्डमा ३ मैत्रीपूर्ण खेल खेल्ने समेत जनाएको छ । जसमध्ये एक खेल थाई लिग वान क्लब छोनबुरी एफसीसँग खेल्ने छ।