काठमाडौं । सहिद स्मारक 'बी' डिभिजन लिग फुटबलमा खुमलटार युथ क्लबले सहज जित निकालेको छ ।
मंगलबार भएको खेलमा खुमलटारले पुल्चोक स्पोर्ट्स क्लबलाई ५-२ गोल अन्तरले पराजित गरेको हो ।
एन्फा कम्प्लेक्स सातदोबाटोमा खुमलटारलाई जित दिलाउन महेश राईले दुई गोल गरे ।
कप्तान सबिन केसी, आयुष घलान र मनिष शेढाईले एक एक गोल गरे ।
पुल्चोकका मिन बहादुर गुरुङ र किश्मत लिम्बुले एक एक गोल फर्काए ।
खेलको २९ औं मिनेटमा महेशको गोलबाट खुमलटारले अग्रता बनाएको थियो ।
खेलको ४० औं मिनेटमा मिनले गोल गर्दै पुल्चोकलाई १-१ गोलको बराबरीमा फर्काए ।
४९ औं मिनेटमा किश्मतले गोल गरेपछि पुल्चोकले २-१ को अग्रता बनायो ।
तर, ५२ औं मिनेटमा सबिनले पेनाल्टीमा गोल गर्दै खुमलटारलाई २-२ गोलको बराबरीमा ल्याए ।
खेलको ५८ औं मिनेटमा आयुषले गोल गरेपछि खुमलटार ३-२ ले अघि रह्यो ।
खेलको ६३ औं मिनेटमा महेशले व्यक्तिगत दोस्रो गोल गर्दै खुमलटारको अग्रता ४-२ को बनाए ।
त्यसपछि खेलको ६५ औं मिनेटमा मनिषले गोल गरेपछि खुमलटार ५-२ ले विजयी भयो ।
जितसँगै खुमलटारले ६ खेलमा १६ अंक जोडेको छ ।
पुल्चोकको ६ खेलमा १ अंक रहेको छ ।
कोरोना भाईरसको महामारीको कारण गत वर्षको चैतबाट रोकिएको 'बी' लिग एन्फाले पुन: सुरु गरेको हो ।
लिगमा १२ क्लबले प्रतिस्पर्धा गरिरहेका छन् ।
एक टिम 'ए' डिभिजन लिगमा बढुवा हुनेछ भने एक टिम 'सी' डिभिजनमा घटुवा हुनेछ ।
