एजेन्सी । युभेन्ट्सले उरुग्वेका फरवार्ड लुईस सुआरेजलाई अनुबन्धन नगर्ने भएको छ ।
क्लबका खेल निर्देशक फाबियो पाराटिसीले यसको पुष्टि गर्दै सुआरेज युभेन्ट्समा नआउने जानकारी दिएका हुन् ।
३३ बर्षिया फरवार्डले यस सिजन क्लब छाड्ने तयारी गरेका छन् । मुख्य प्रशिक्षक रोनाल्ड कोम्यानले उरुग्वेका फरवार्ड आफ्नो योजनामा नरहेको जानकारी दिएपछि सुआरेजले नयाँ गन्तव्यको खोजी गरिरहेका छन् ।
युभेन्ट्सले बार्सिलोनाका फरवार्ड सुआरेजलाई टुरिनमा उतार्न इच्छा देखाएको थियो । उनलाई १० मिलियन पाउण्डमा सिरि ए क्लबमा अनुबन्धन गर्न समेत दुवै पक्ष सहमत देखिएका थिए । सोही अनुसार पासपोर्ट प्राप्त गर्न सुआरेजले ईटालीको भाषा परिक्षा समेत लिएका थिए ।
युभेन्ट्सका प्रशिक्षक आन्द्रे पिर्लोले प्रशासनीक कारण सुआरेज क्लबमा जोडिने सम्भावना कम रहेको बताएका छन् । युभेन्ट्स निर्धारित समयमा सुआरेजसंग सम्झौता हुनेमा निराश देखिएको छ । सोही कारण युभेन्ट्सले सुआरेज अनुबन्धनको प्रयासलाई रद्ध गर्दै नयाँ विकल्पमा अघि बढेको छ ।
‘सुआरेज सूचिबाट हटेका छन् । खेलाडी सरुवाको समय भन्दा ढिलामात्र पासपोर्ट प्राप्त हुने देखिएको छ ।’ खेल निर्देशक पाराटिसीले भने ।
‘हामीले सुआरेजको विकल्पको मुल्याङ्कन गर्यौ, जब हामीलाई प्रस्ताव आएको थियो । उनी इटालीको नागरिकता प्राप्त गर्ने प्रक्रियामा थिए । हामीले त्यही समय नागरिकता प्राप्त गर्ने सम्भावनाको मुल्याङ्कन गरेको थियौ ।’ उनले थपे ।
‘यो अब सम्भव छैन । हामी कहिल्यै नजिक थिएनौ ।’ उनले भने ।
युभेन्ट्स पछिल्लो समय रोमाका फरवार्ड इडेन जेकोसंग जोडिएको छ । पाराटिसीले जेको मात्र नभएर अन्य विकल्पमा समेत छलफल भईरहेको बताएका छन् ।
‘जेकोको अवस्था छैन । यहाँ फरवार्डको आवश्यकता छ । युभेन्ट्सलाई सेन्टर फरवार्ड चाहिएको छ । हामी अहिले एक मात्र फरवार्डको बिषयमा सोचिरहेका छौ ।’ उनले भने ।
