काठमाडौं । नेपालको लिग च्याम्पियन सिग्नेचर मनाङ मर्स्याङ्दी क्लबले एएफसी कप फुटबलमा (भोलि) बुधबार ढाका अबहानी लिमिटेडसँग प्रतिस्पर्धा गर्दैछ ।
ढाकास्थित बंगबन्धु स्टेडियममा मनाङले अबहानीसँग बुधबार अवे खेल खेल्न लागेको हो । मनाङ र अबहानीबीचको खेल नेपाली समय अनुसार बेलुका ५:३० बजे सुरु हुनेछ ।
घरेलु टोलीविरुद्ध मैदान उत्रदा मनाङ घरेलु मैदानमा व्यहोरेको हारको बदला लिने योजनामा हुनेछ ।
मंगलबार भएको प्रि-म्याच कन्फरेन्समा बोल्दै प्रशिक्षक छिरिङ लोप्साङले टिम जित निकाल्ने योजनासहित मैदान उत्रने बताए ।
उनले अघिल्लो खेलमा राम्रो प्रर्दशन गरेपनि जित्न नसकेको स्विकार गर्दै बुधबार हुने खेलमा जित निकाल्ने दाबी गरे । उनले कृतिम मैदानमा खेल्न खेलाडीलाई असहज भएको स्विकार गर्दै बंगलादेशको घाँसे मैदानमा आफ्नो स्वभाविक खेल पस्किने बताए ।
कप्तान विराज महर्जनले राष्ट्रिय टिममा भएका कारण राम्रो तयारी गर्न नपाएको बताउँदै महत्वपुर्ण खेलमा जित निकाल्ने बताए ।
'खेल दुवै टिमका लागि उत्तिकै महत्वपुर्ण छ । अवहानी निकै राम्रो र बलियो टिम हो । अघिल्लो खेलमा गोलको अवसर पाएका थिएनौ । सुधारिएको खेल प्रर्दशन गर्दै नतिजा आफ्नो पक्षमा पार्नेछौ ।' उनले भने ।
बंगलादेशी भुमि आफ्नो खेल जिवनको निर्णायक स्थान भएको बताउँदै उनले आत्मविश्वासी भएर राम्रो खेल प्रर्दशन गर्ने बाचा गरे ।
यसअघि गत अप्रिलमा भएको होम खेलमा मनाङ अबहानीसँग १-० ले पराजित भएको थियो । तर, बुधबार मनाङ अबहानीसँग उसैको मैदानमा पराजित गर्न चाहन्छ ।
समूह 'ई' मा रहेको मनाङले ४ खेलमा २ अंक जोडेको छ । मनाङ समूहको पुछारमा रहेको छ । अबहानी ४ खेलबाट ७ अंक जोडेर दोस्रो स्थानमा छ ।
यस समूहमा चेन्नायीन एफसी ७ अंक जोडेर शीर्ष र मिनर्वा पन्जाब ४ खेलमा ४ अंक जोडेर तेस्रो स्थानमा रहेको छ ।
-1746894755.jpeg)
