एजेन्सी । भारतमा आयोजना हुने इण्डियन प्रिमियर लिग (आईपीएल) क्रिकेटको हरेक संस्करणमा पुरस्कृत गरिने विधामध्ये एक हो - इमर्जिङ प्लेयर अवार्ड । जुन अवार्ड उदाउँदो खेलाडीले प्राप्त गर्ने छन् ।
भारतमा अहिले १२ औं संस्करणको प्रतियोगिता जारी छ । र, पहिलो पटक इमर्जिङ प्लेयर अवार्डका लागि नेपाली खेलाडी मनोनित भएका छन् । नेपालका ग्लोबल आइकन तथा युवा लेग स्पिनर सन्दीप लामिछाने पहिलो पटक इमर्जिङ प्लेयर अवार्डका लागि मनोनित भएका छन् ।
गत बर्षको आईपीएल खेल्दै टी-ट्वान्टीमा डेब्यु गरेका सन्दीपले डेब्यु सिजन नै ३ खेलमा ५ विकेट हात पार्दै आफ्नो प्रतिभा प्रस्फुटन गरेका थिए । पहिलो सिजनको प्रदर्शनबाट प्रभावित भएर दिल्ली क्यापिटल्सले सन्दीपलाई यस सिजन रीटेन गरेको थियो ।
आईपीएलको डेब्यु सिजन नै चम्किएपछि सन्दीपले विश्वभरका फ्रेन्चचाइज लिगमा खेल्ने मौका पाए । सन्दीप हरेक लिगमा सफल पनि भए । टी-ट्वान्टीमा डेब्यु गरेको एक बर्ष नबित्दै सन्दीपले ५ भन्दा बढी राष्ट्रको फ्रेन्चचाइज लिग खेले ।
सन्दीपको उक्त लयलाई मध्यनजर गर्दै यो सिजन दिल्लीले सुरुवाती २ खेलपछि सन्दीपलाई मौका दिएको थियो । तर, यस सिजन सन्दीप निकै महँगा साबित भएका छन् । सन्दीपले ४ खेलमा ८.३७ को इकोनमीमा ५ विकेट हात पारेका छन् । त्यसपछि भने दिल्लीले पछिल्लो २ खेलमा सन्दीपलाई विश्राम दिएको छ ।
यस सिजन मध्यम प्रदर्शन गरिरहेपनि सन्दीप इमर्जिङ प्लेयरका लागि मनोनित भएका छन् । तर, सन्दीपलाई यस अवार्ड जित्न अन्य ४ खेलाडीलाई पछि पार्नु पर्ने हुन्छ ।
अवार्डका लागि सन्दीपसंगै भारतका मोहमद सिराज,राहुल चाहर, श्रेयस गोपाल र इंग्ल्यान्डका जोफ्रा आर्चर रहेका छन् ।
यस अवार्ड समर्थकको भोट र खेल कमेन्टेटरको भोटको आधारमा प्रदान गरिने छ । मतको आधारमा सन्दीप अघि रहेका छन् । सन्दीपले ७० प्रतिशत मत पाईसकेका छन् । सिराजले २५ प्रतिशत मत पाएका छन् ।
तर, यस अवार्डमा भारतीय खेलाडीको दबदबा रहदै आएको छ । त्यसैले यस पटक सन्दीपलाई भारतीय खेलाडी कै चुनौती हुनेछ ।
सन् २०१६ मा बंगलादेशका मुस्ताफिजुर रहमानले बाहेक अन्य विदेशी खेलडीले यो उपाधि हात पार्न सकेका छैनन् । यस पटक पनि ३ भारतीय खेलाडी रहेका छन् ।
यस अवार्डका लागि मनोनित हुने आधार के के ?
१. सन् १९९२ अप्रिल १ पछि जन्मिएका खेलाडी मात्र यस विधामा सहभागी हुने छन् ।
२. आईपीएलमा २५ खेल वा सो भन्दा कम खेल खेलेको हुनु पर्छ ।
३. आफ्नो देशको लागि ५ खेल भन्दा बढी खेलेको हुनु हुँदैन ।
४. अघिल्लो पटक यो उपाधि जितेको हुनु हुँदैन ।
हालसम्मका इमर्जिङ प्लेयर अवार्ड विजेताहरु
सन् २००८ - श्रीभास गोवास्व्सामी
सन् २००९ - रोहित शर्मा
सन् २०१० - सौरभ तिवारी
सन् २०११ - इकबाल अब्धुला
सन् २०१२ - मनदीप सिंह
सन् २०१३ - सन्जु स्याम्सन
सन् २०१४ - अक्षर पटेल
सन् २०१५ - श्रेयस आयर
सन् २०१६ - मुस्ताफिजुर रहमान
सन् २०१७ - बसिल थम्पी
सन् २०१८ - ऋषब पन्त
