काठमाडौं । सहिद स्मारक बी डिभिजन लिगमा श्री भगवती युथ क्लबले फराकिलो जित दर्ता गरेको छ । सोमबार ललितपुरको सातदोबाटोस्थित एन्फा मैदानमा भएको खेलमा श्री भगवतीले पुल्चोक स्पोर्टस क्लबलाई ६–० गोल अन्तरले हराएको हो ।
हारसँगै पुल्चोकले शीर्ष स्थानमा उक्लिने मौका गुमाएको छ ।
सुरुवाती दुई खेल जितेर बलियो देखिएको पुल्चोक तेस्रो चरणको खेलमा लडखडायो ।
दर्शन गुरुङले ह्याट्रिक गरेको खेलमा श्री भगवती हाबी रह्यो । दर्शन गुरुङले ४ गोल गर्दा कर्लोस बखरीया र मोहन बहादुर थापा मगरले एक÷एक गोल गरे । दर्शनले खेलको २४, ३६, ६७ र ईन्जुरी समयमा गर्दै चार गोल गरे ।
जितपछि श्री भगवतीको ६ अंक भएको छ । पराजित पुल्चोकको ६ अंक रहेको छ ।
आजै भएको अर्को खेलमा ब्वाइज युनियन र रानीपोखरी कर्नर टिम आरसिटीले १–१ गोलको बराबरी खेल्दै अंक बाँडे ।
खेलमा ब्वाइज युनियनले अग्रता बनाएपनि आरसिटीले बराबरी गोल फर्काउन सफल भयो ।
दुबै गोल दोस्रो हाफमा निस्किएका थियो । आकाश राईले ब्वाइज युनियनलाई ५१ औ मिनेटमा गोल गर्दा नवराज गुरुङले ८६ औ मिनेटमा आरसिटीका लागि बराबरी गाल फर्काए ।
तेस्रो खेलसँगै आरसिटीको ४ अंक छ । ब्वाइज युनियनको २ अंक छ ।
