काठमाडौं। एक खेलअगाबै आइसिसी महिला विश्वकपको ग्लोबल छनोटमा स्थान बनाउन नेपालले सोमबार संयुक्त अरब इमिरेट्स (युएई)लाई चुनौती प्रस्तुत गर्दैछ।
एसिया छनोटको ‘सुपर थ्री’मा आइतबार युएईलाई ५४ रनले पराजित गर्दै थाइल्यान्डले ग्लोबल छनोटमा आफ्नो स्थान सुरक्षित गरिसकेको छ। थाइल्यान्डले आठ अंक पुर्याएको छ।
दुई खेल खेल्न बाँकी नेपालको पाँच र युएईको ६ अंक छ। बिहान ८:१५ बजेबाट सुरु हुने खेलमा युएईमाथि जित हासिल गरे नेपाल पनि ग्लोबलमा पुग्नेछ। पराजित भए प्रतियोगिताबाट बाहिरिने छ।
थाइल्यान्ड समूह ‘ए’ मा शीर्ष स्थानमा रहँदै ‘सुपर थ्री’मा प्रवेश गरेको हो। युएई समूह ‘बी’ र नेपाल समूह ‘सी’ को शीर्ष स्थानमा रहेका थिए। समूह चरणमा हासिल गरेको अंक नै ‘सुपर थ्री’ मा जोडिने प्रावधान छ। सोही अनुसार नेपालले पाँच अंकसहित ‘सुपर थ्री’को अंक तालिकामा पुछारमा रहेको थियो।
