बायर्नको भेट फेरि पिएसजीसँग
काठमाडौं। ह्यारी केनले दुई गोल गरेपछि जर्मन च्याम्पियन बायर्न म्युनिख क्लब विश्वकपको क्वार्टरफाइनलमा प्रवेश गरेको छ।
सोमबार सम्पन्न अन्तिम १६ को खेलमा बायर्नले ब्राजिलियन क्लब फ्लामेन्गोलाई ४–२ ले पाखा लगाएको हो। गत साता बेन्फिकासँगको हारपछि बायर्नले प्रभावशाली पुनरागमन गर्दै खेलको सुरुआतमै दुई गोलको अग्रता बनायो। त्यसपछि फ्लामेन्गोमाथि दबदबा जमाउँदै जित सुरक्षित गर्यो।
केन भन्छन्, ‘मलाई थाहा छ मेरा गोलबाट नै धेरैले मूल्यांकन गर्छन्। तर, म सधैं टिमलाई जिताउने प्रयत्न गर्छु।’
अब बायर्नले शनिबार एटलान्टामा हुने क्वार्टरफाइनलमा च्याम्पियन्स लिग विजेता पेरिस सेन्ट–जर्मेन (पिएसजी)सँग प्रतिस्पर्धा गर्नेछ। पिएसजीले सोही दिन लिओनल मेसीको इन्टर मियामीलाई ४–० ले हराएर अघिल्लो चरणमा स्थान बनाइसकेको छ। यी दुई टोली सन् २०२० को च्याम्पियन्स लिग फाइनलमा भिडेका थिए।
बायर्नले खेलको छैठौं मिनेटमै अग्रता लियो। फ्लामेन्गोका स्टार एरिक पुल्गारले जोशुआ किमिचको कर्नरमा आत्मघाती गोल गरे। नवौं मिनेटमा केनको डिफ्लेक्टेड प्रहारले बायर्नलाई २–० को अग्रता दिलायो।
केनले दोस्रो गोल ७३औं मिनेटमा जोशुआ किमिचको पासमा गरे, जुन प्रतियोगितामा उनको तेस्रो गोल हो। फ्लामेन्गोका लागि ३२औं मिनेटमा गेर्सनले गोल गर्दै खेल २–१ बनाए। तर, लिओन गोरेत्ज्काले केही समयमै बायर्नको अग्रता फेरि दुई गोलमा पुर्याए।
दोस्रो हाफको ५४औं मिनेटमा जोर्गिन्होले पेनाल्टीमा गोल गर्दै ३–२ बनाएर खेलमा फ्लामेन्गोलाई आशा दिलाए। तर, केनले पुनः गोल गरेपछि फ्लामेन्गोको यात्रा यही समाप्त भयो।
फ्लामेन्गोका प्रशिक्षक फिलिप लुइसले भने, ‘हामीसँग मौका थियो। तर, बायर्न यो खेलमा हामीभन्दा बलियो टिम देखियो।’ बायर्नको यो जितसँगै कम्तीमा चार युरोपेली क्लब प्रतियोगिताको क्वार्टरफाइनलमा पुगेका छन्।
