केन्द्रमा मेसी
काठमाडौं। कागजमा हेर्दा खेल एकतर्फी देखिन्छ। पेरिस सेन्ट–जर्मेन (पिएसजी) ४ अनि इन्टर मियामी ०।
तर, मर्सिडिज–बेन्ज स्टेडियममा जब अन्तिम सिठी बज्यो, त्यतिबेला सबैको नजर एउटै व्यक्तिमाथि थियो– लिओनल मेसी।
स्कोरले एउटा कथा भन्यो। तर, माहोलले अर्कै कथा बुनिसकेको थियो। युरोपेली च्याम्पियन पिएसजी र मेजर लिग सकर (एमएलएस) को उदाउँदै गरेको टोली इन्टर मियामीबीचको भिडन्तलाई सुरुमै यस्तै एकतर्फी हुने आँकलन गरिएको थियो।
यो कुरा पिएसजीले पहिलो हाफमा गरेको गोल वर्षाले पुष्टि गरेजस्तो देखियो। जोआओ नेभेसको सुरुआती गोल गरे। त्यसपछि थप तीन गोल गर्दै पिएसजीले खेलमा निर्णायक पकड बनायो। तर, दोस्रो हाफमा कथा फेरियो। यो कथा मेसी वरिपरि घुम्यो।
पिएसजीलाई ‘ट्रिबेल’ उपाधि जिताएका मुख्य प्रशिक्षक लुइस एनरिके जान्दथे पहिलो हाफपछि खेल सकिएको थिएन। ‘यस स्तरका खेलाडीहरूसँग खेल्न सजिलो हुँदैन,’ उनले खेलपछि भने,‘४–० को स्कोर हेर्नेहरूले सोच्छन्, यो सहज जित थियो। तर, खासमा दोस्रो हाफमा हामीलाई निकै मिहिनेत गर्नुपर्यो।’
३८ वर्षका मेसीले अझै पनि आफ्नो स्टारडम गुमाएका छैनन्। उनले खेललाई एकजना ‘मायस्ट्रो’ जस्तो निर्देशन दिइरहेका थिए। लुइस सुआरेजसँग संयोजन र जोर्डी आल्बाको तीव्र फ्ल्याङ्क रनले दोस्रो हाफमा इन्टर मियामीलाई एकाएक जीवित बनायो। तर, गोल भने गर्न सकेनन्। यद्यपि, युरोपको उत्कृष्ट क्लबलाई सजक हुन बाध्य बनाए।
‘यो अविस्मरणीय क्षण थियो,’ पिएसजीका डिफेन्डर लुकास बेराल्डोले भन्छन्, ‘म मेसीलाई हेरेर हुर्केको हुँ। उनीसँग एकै मैदानमा खेल्नु सपनाजस्तो लाग्यो।’
एनरिके भने भावनामा होइन, यथार्थमा उभिएका थिए। च्याम्पियन्स लिग, लिग १ र फ्रेन्च कप जितिसकेको उनको टोली क्लब विश्वकपको क्वार्टरफाइनलमा पुगेको छ। तर, उनले इन्टर मियामीले आफूमाथि दबाब बनाएको स्वीकार गरे।
‘हामीले पहिलो हाफपछि अलिक सहज भयो जस्तो ठानेका थियौं। तर, उनीहरूले त्यसैलाई उपयोग गरे। यस्तो स्टार खेलाडीहरूसँग खेल्दा अल्छी भएछौं भने सजाय पाउँछौं,’ उनले भने।
पिएसजी अगाडि बढ्दा इन्टर मियामीले हारलाई पनि गर्वका रूपमा लिएको छ। मुख्य प्रशिक्षक बनेका अर्जेन्टिनी पूर्वकप्तान जेभियर माश्चेरानोले स्तरको अन्तर स्वीकार गरेका छन्।
