विराटनगर। टाई ब्रेकरबाट जित निकाल्दै कोशी प्रदेश प्रहरी कार्यालय रानी विराटनगर चौथो संस्करणको मिल्स गोल्डकप फुटबल प्रतियोगिताको सेमिफाइनलमा पुगेको छ।
विराटनगरको जुट मिलको खेल मैदानमा सोमबार सम्पन्न अन्तिम क्वार्टरफाइनल खेलमा डिफेन्डिङ च्याम्पियन गोलबजार स्पोर्टिङ क्लब सिराहलाई टाई ब्रेकरमा ४–३ गोलले हराउँदै प्रहरी सेमिफाइनलमा पुगेको हो।
जितसँगै प्रहरीले फाइनल प्रवेशको लागि बिहीबार घरेलु टिम पेमा युवा क्लब विराटनगरसँग खेल्नेछ। निर्धारित समयसम्म २–२ गोलको बराबरी भएपछि टाई ब्रेकरबाट जितेको छिनोफानो भएको हो। जितको लागि टाई ब्रेकरमा प्रहरीको तर्फबाट उज्ज्वल राई, सन्देश विक, विवेक राई र सुमित प्रधानले गोल गरेका थिए।
गोलबजारको तर्फबाट विनोद राई र निर्जल मोक्तानले मात्र गोल गरे। गौरव श्रेष्ठ र मीन धिमालको प्रहार प्रहरीका गोलकिपर पुरन राईले उत्कृष्ट बचाए। टाई ब्रेकरमा दुई गोल सेभ गर्ने प्रहरीका पुरन खेलको प्लेअरअफ म्याच घोषित भए।
अन्तिम क्वार्टरफाइनल खेलमा पहिलो हाफमा गोलबजार स्पोर्टिङ क्लब सिराहले अग्रता लिएको थियो। खेल शुरू भएको १२औँ मिनेटमा निशान्त लिम्बुले गोल गरी टिमलाई अग्रता दिलाए। डीबक्सभित्र सन्दीप लिम्बुले निकालिदिएको पासलाई गोलबजारका निशान्तले आकर्षक गोल गरे।
दोस्रो हाफदेखि प्रहरीले आक्रामक खेल खेल्दै ४४औँ मिनेटमा रमेश राजवंशीले गोल गरी खेल १–१ को बराबरीमा ल्याए। अभिषेक आले मगरले निकालेको पासलाई रमेशले गोल गरे । खेल सकिँन दुई मिनेट बाँकी रहँदा गोलबजारका सिनोद राईले गोल गरी अग्रता दोब्बर बनाए। तर, गोलबजारले दोस्रो गोल गरेको एक मिनेट बित्न नपाउँदै प्रहरीको तर्फबाट विवेक राईले गोल गरी खेल २–२ गोलको बराबरीमा ल्याए।
खेलको अन्तिममा गोलबजारका खेलाडी समालिन नसक्दा चौथो संस्करणको मिल्स गोल्डकपको उपाधि जित्ने सपना चकनाचुर भयो। बुधबार हुने पहिलो सेमिफाइनल खेल सशस्त्र प्रहरी बल (एपीएफ) पकली सुनसरी र कनकाई स्पोर्टिङ क्लब सुरुङगा झापाबीच हुनेछ।
