काठमाडौँ। विश्व नम्बर एक टी–२० ब्याट्सम्यान सूर्यकुमार यादवले चोटका कारण यस सिजन इन्डियन प्रिमियर लिग (आईपीएल) खेलेका छैनन्। त्यसैले मुम्बई इन्डियन्सले उनलाई खुब मिस गरिरहेको छ।
सूर्यको अनुपस्थितिमा हार्दिक पाण्ड्याको कप्तानीमा रहेको मुम्बईले दुई खेल खेलिसकेको छ। तर, दुवै खेलमा हार बेहोरेको छ। सोमबार तेस्रो खेलअन्तर्गत मुम्बईले घरेलु मैदान वानखेडे स्टेडियममा राजस्थान रोयल्ससँग खेल्ने छ।
राजस्थानविरुद्धको खेलमा सूर्यको उपस्थिति हुने सम्भावना कम छ। तर, खेलअघि पीयूष चावलाले उनको फिटनेसको अपडेट दिँदै टोलीले नेसनल क्रिकेट एकेडेमी (एनसीए)बाट जवाफ पर्खिरहेको बताएका छन्।
गत वर्ष मुम्बईका लागि सबैभन्दा सफल बलर बनेका पीयूषलाई सूर्यको फिटनेसबारे सोध्दा भने,'एनसीएले उनलाई अझै पनि निगरानी गरिरहेको छ। प्रशिक्षकलाई थाहा होला। तर, खेलाडीलाई योभन्दा बढी थाहा छैन।'
आईपीएल २०२३ मा मुम्बईका लागि ६०० भन्दा बढी रन बनाएका सूर्य डिसेम्बर २०२३ देखि मैदान बाहिर छन्। दक्षिण अफ्रिका भ्रमणमा भएको तेस्रो टी–२० खेलमा उनी घाइते भएका थिए।
केही दिनअघि सूर्यले मुम्बईका लागि शुरूका खेल खेल्न नसक्ने भारतीय क्रिकेट कन्ट्रोल बोर्ड (बीसीसीआई) स्रोतले पुष्टि गरेको थियो। उनी मुम्बईका महत्त्वपूर्ण खेलाडी हुन्। मुम्बईले २०२२ अक्सनअघि उनलाई रिटेन गरेको थियो। उनले मुम्बईका लागि ८५ खेलमा २ हजार ६४१ रन बनाएका छन्।
यो सिजनको आईपीएलपछि अमेरिका र वेस्ट इन्डिजले संयुक्त रूपमा आईसीसी टी–२० विश्वकप आयोजना गर्ने छ। यसका लागि भारतले अप्रिलको अन्तिम सातासम्म टोली घोषणा गर्ने छ। आईपीएलमा खेलाडीको प्रदर्शनका आधारमा भारतीय टोली छनोट हुने बताइएको छ।
पक्कै पनि सूर्य यस प्रतियोगितामा भारतीय टोलीको एक हिस्सा हुनेछन्। त्यसैले विश्वकपलाई ध्यानमा राख्दै उनी छिट्टै मैदानमा फर्किने अपेक्षा गरिएको छ।
