सदस्य सचिवसँग कार्यालयमै पुगेर तदर्थ समितिको भेट

काठमाडौं । नेपाल ओलम्पिक कमिटीको तदर्थ समितिले राष्ट्रिय खेलकुद परिषद् राखेपका सदस्य सचिव टंकलाल घिसिङसँग भेट गरेको छ । 

संयोजक धुव्रबहादुर प्रधान नेतृत्वको टोलीले सोमबार सदस्य सचिव घिसिङलाई उनकै कार्यालयमा पुगेर भेट गरेको हो ।

यसअघि तदर्थ समितिले खेलकुद मन्त्री तेजुलाल चौधरीसँग भेट गरेर पछिल्लो गतिविधिबारे जानकारी गराएको थियो । सो भेटमा खेलकुद मन्त्रीले सदस्य सचिव घिसिङलाई समेत सँगै राखेका थिए ।

खेलकुद मन्त्रालयमा सदस्य सचिवलाई भेटेको तदर्थ समितिले सदस्य सचिव घिसिङलाई पुन कार्यालय पुगेर भेट गरेको हो । 

सदस्य सचिवसँग नेपाल ओलम्पिक कमिटीको तदर्थ समितिको भेटलाई खेलकुद वृत्तमा महत्वका साथ हेरिएको छ । 

समितिले आसन्न २० औं एसियाली खेलकुदमा नेपाली खेलाडीको सहभागीता, खेलाडीको तालिम र सुविधा तथा वैदेशिक प्रशिक्षणबारेमा सदस्य सचिवसँग गहन छलफल भएको बताएको छ । 

परिषद्ले ओलम्पिकको तदर्थ समितिलाई पूर्ण सहयोग रहने बताएको तदर्थ समितिका प्रवक्ता समिम मियाँ अन्सारीले प्रेस रिलिज जारी गरेर बताएका छन् ।

भेटमा संयोजक प्रधान सहित प्रवक्ता अन्सारी, राजीवबिक्रम शाह लगायतका कार्यसमितिका पदाधिकारीहरुको उपस्थिती रहेको थियो ।