शेख दाजु भाइको सानदार ब्याटिङ

काठमाडौं। आसिफ शेखको सानदार सुरुआत र आरिफ शेखको उस्तै फिनिसिङसँगै नेपालले आईसीसी क्रिकेट विश्वकप लिग २ मा ओमानलाई २५७ रनको लक्ष्य दिएको छ।

कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ थालेको नेपालले अन्तिम २ बल बाँकी रहँदा सबै विकेट गुमाएर २५६ रन बनाएको हो।

नेपालका ओपनर आसिफले सर्वाधिक ९४ रन बनाए। ९७ बल खेलेका उनले ७ चौका प्रहार गरे। उनी र अर्जुन कुमालले दोस्रो विकेटका लागि १२३ रनको विशाल साझेदारी गरेका थिए।

अर्जुनले भने ८७ बलमा ४ चौकासहित ४८ रन बनाए। दीपेन्द्रसिंह ऐरी ३३ र गुल्शनकुमार झा १७ रनमा आउट हुँदा आरिफले अन्तिममा आएर आक्रमक इनिङ्स खेले।

उनले २४ बलमा १ चौका र ४ छक्कासहित ४३ रन बनाए।

ओमानका नदिम खानले सर्वाधिक ३ विकेट लिए। १० ओभर बलिङ गरेका उनले ४१ रन खर्चिए।

शकिल अहमेद र हशन शाहले समान २ विकेट राखे।