काठमाडौं। बंगलादेशका स्टार अलराउन्डर शाकिब अल हसन मैदानमा उत्रनेबित्तिकै कीर्तिमान आफैं पछि लाग्छन्।
आइतबार क्यारिबियन प्रिमियर लिग (सीपीएल) २०२५ मा एन्टिगुवा एन्ड बारबुडा फाल्कन्सका लागि खेल्दै उनले अर्को ठूलो कीर्तिमान आफ्नो नाममा थपेका छन्।
३८ वर्षीय शाकिब टी–२० क्रिकेटमा ७ हजार रन र ५०० विकेटको दोहोरो कीर्तिमान पूरा गर्ने पहिलो खेलाडी बनेका छन्। यो उपलब्धि उनले फाल्कन्स र सेन्ट किट्स एन्ड नेभिस प्याट्रियट्सबीचको खेलमा प्राप्त गरेका हुन्।
खेलमा प्रवेश गर्दा शाकिबलाई एक विकेटको खाँचो थियो। उनले पाकिस्तानका मोहम्मद रिजवानलाई १५औं ओभरमा रिटर्न क्याचमार्फत आउट गर्दै ५०० विकेटको कीर्तिमान पूरा गरे। त्यसपछि आफ्नो अर्को ओभरमा दुई विकेट थप्दै काइल मायर्स र नवीन बिडाइसलाई आउट गरे।
अन्ततः उनले ३–११ को उत्कृष्ट बलिङ फिगरसहित खेल समाप्त गरे र आफ्नो करियरमा कुल ५०२ विकेट पुर्याए। ५०० विकेटको कीर्तिमान हासिल गर्ने शाकिबभन्दा अघि राशिद खान (६६०), ड्वेन ब्राभो (६३१), सुनिल नारायण (५९०) र इमरान ताहिर (५५४) ले मात्रै यसअघि यो उपलब्धि हासिल गरेका थिए।
तर, शाकिब विशेष छन्। उनी बलिङमा मात्रै सीमित छैनन्। उनले ७ हजार ५७४ रनको कीर्तिमान समेत पूरा गरेर टी–२० क्रिकेटमा यति ठूलो दोहोरो कीर्तिमान बनाएका हुन्। त्यसमा पनि उनी यो उपलब्धि हासिल गर्ने एकमात्र खेलाडी बनेका हुन्।
ब्राभो यस कीर्तिमाननजिक पुगेका थिए। उनको नाममा ६ हजार ९७० रन र ६३१ विकेट थियो। एन्ड्रे रस्सेल पनि यो कीर्तिमानतर्फ अघि बढिरहेका छन्, उनको नाममा ९ हजार ३६१ रन र ४८७ विकेट छ।
खेलमा शाकिबको बलिङले सेन्ट किट्स एन्ड नेभिस प्याट्रियट्सलाई १३३/९ मा रोक्न मद्दत गर्यो। एन्टिगुवा एन्ड बारबुडा फाल्कन्सले निर्धारित १९.४ ओभरमा सात विकेट गुमाएर लक्ष्य पूरा गर्यो।
शाकिबले ब्याटिङमा पनि योगदान गरे। नम्बर ४ मा आएर १८ बलमा दुई छक्का र एक चौका प्रहार गर्दै २५ रन बनाए, तर स्टम्पमा आउट भए। उत्कृष्ट प्रदर्शनलाई ध्यानमा राख्दै उनलाई उत्कृष्ट खेलाडी घोषित गरियो।
