बागमतीको जितमा सन्दीपको ५ विकेट

काठमाडौं। कप्तान सन्दीप लामिछानेले ५ विकेट लिएसँगै बागमती प्रदेशले प्रधानमन्त्री कप एकदिवसीय क्रिकेट प्रतियोगितामा तेस्रो जित निकालेको छ।

बुधबार सम्पन्न खेलमा बागमतीले कोशी प्रदेशलाई ७ विकेटले पराजित गरेको हो। जितसँगै बागमती ६ अंकसहित सातौं स्थानमा उक्लिउको छ। कोशी भने ३ अंकसहित १० टोली सम्मिलित प्रतियोगिताको नवौं स्थानमा छ।

कोशीले दिएको १०० रनको सामान्य लक्ष्य बागमतीले ९ ओभरमा ३ विकेटको क्षतिमा भेटाएको हो।

बागमतीका मध्यक्रमका ब्याटर विवेक मगरले सर्वाधिक ६१ रनको इनिङ्स खेले। अविजित रहेका उनले २८ बलमा १० चौका र दुई छक्का प्रहार गरे।

ओपनर रिङजिन लामाले १७ रनको योगदान दिँदा प्रतीश जिसी १७ रनमा अविजित रहे।

कोशीका विपिन महतोले सर्वाधिक २ विकेट लिए। ३ ओभर बलिङ गरेका उनले २८ रन खर्चिए। ज्ञानेन्द्र श्रेष्ठले १ विकेट राखे।

त्यसअघि जनकपुरस्थित रामजानकी बहुउद्देश्यीय रंगशालामा टस हारेर पहिला ब्याटिङ थालेको कोशीले २८.२ ओभरमा सबै विकेट गुमाउँदै ९९ रन बनाएको थियो।

कोशीका कप्तान सुजन थपलियाले सर्वाधिक २१ रनको योगदान दिए। ४२ बल खेलेका उनले २ चौका प्रहार गरे।

अंकित सुवेदी १९, रोहन शाह १८ र शिवाश बजगाईंले १० रन बनाउँदा अन्य ब्याटरले दोहोरो अंकमा रन छुन सकेनन्।

बागमतीका कप्तान सन्दीपले ह्याट्रिकसहित ५ विकेट लिए। उनले ७.२ ओभर बलिङ गर्दै ३३ रन खर्चिएर ५ विकेट लिएका हुन्।

रिजन ढकालले २ विकेट लिँदा ईशान पाण्डे र प्रतीश जिसीले समान १ विकेट राखे।