उद्घाटन खेलमा रेडहर्स र जर्जियन आमनेसामने

इलाम — तेस्रो इलाम गोल्डकप फुटबल प्रतियोगिता बैशाख ५ गतेदेखि १२ गतेसम्म सञ्चालन हुने भएको छ। प्रतियोगिताको उद्घाटन खेलमा आयोजक रेडहर्स एफसी र भारतको जर्जियन एफसीबीच प्रतिस्पर्धा हुने आयोजकले जनाएको छ।

रेडहर्स फुटबल क्लबले पत्रकार सम्मेलनमार्फत सार्वजनिक गरेको खेल तालिका अनुसार यसपटक प्रतियोगितामा राष्ट्रिय लिगका ३ क्लबसहित कुल ८ टोलीको सहभागिता रहनेछ।

क्वाटरफाइनल अन्तर्गत बैशाख ६ गते फिदिम स्पोर्टिङ क्लब र रोलिङ क्लब झापाबीच प्रतिस्पर्धा हुनेछ भने बैशाख ७ गते मछिन्द्र एफसीले मलेसियाको एन पेनाङ एफसीसँग खेल्नेछ। त्यसैगरी अन्तिम क्वाटरफाइनलमा बैशाख ८ गते डिफेन्डिङ च्याम्पियन न्युरोड टिम (एनआरटी) र चित्लाङ एफसी आमनेसामने हुनेछन्।

प्रतियोगिता सम्पन्न गर्न करिब ७८ लाख १० हजार रुपैयाँ खर्च हुने अनुमान गरिएको छ। आयोजकका सदस्य तथा अखिल नेपाल फुटबल संघ (एन्फा) का पूर्व केन्द्रीय सदस्य निरोज खड्गीले यस वर्ष नेपाली राष्ट्रिय टोलीका अधिकांश खेलाडी प्रतियोगितामा सहभागी हुने जानकारी दिए।

उनका अनुसार मलेसियाको एन पेनाङ एफसी प्रतियोगिताको मुख्य आकर्षण रहनेछ, जसमा केही नेपाली खेलाडीसहित युरोप, ब्राजिललगायत विभिन्न देशका खेलाडी सहभागी हुनेछन्।

यस वर्ष राष्ट्रिय खेलकुद परिषदको निर्णयअनुसार श्रम स्वीकृति लिएका विदेशी खेलाडीहरूले मात्र खेल्न पाउने व्यवस्था गरिएको छ। अघिल्ला संस्करणमा भने यस्तो नियम कडाइका साथ लागू गरिएको थिएन।

आयोजकले प्रतियोगितासँगै भविष्यका लागि खेलाडी उत्पादनमा समेत ध्यान दिने लक्ष्य लिएको जनाएको छ। खेलाडीहरूको बसोबास सहज बनाउन इलामका होटलहरूसँग सहकार्य गरिएको छ भने करिब १० हजार दर्शक अट्ने बाँसको अस्थायी प्यारापिट निर्माण भइरहेको छ।

प्रतियोगिताको मुख्य प्रायोजक गैरआवासीय नेपाली संघ (एनआरएनए) रहेको छ। पुरस्कार राशी यथावत् राखिएको छ—विजेताले १० लाख रुपैयाँ र उपविजेताले ५ लाख रुपैयाँ प्राप्त गर्नेछन्।