काठमाडौँ । अर्णभ पटेलले ५ विकेट लिएसँगै केन्याले अफ्रिका गेम्समा दक्षिण अफ्रिकालाई पराजित गरेको छ।
केन्याले दक्षिण अफ्रिकालाई ७० रनले पराजित गरेको हो। केन्याले दिएको १४२ रनको लक्ष्य पछ्याएको दक्षिण अफ्रिका १५ ओभरमा ७१ रनमै समेटियो।
दक्षिण अफ्रिकाका कप्तान जर्ज भान हिर्डेनले सर्वाधिक २२ रन बनाए। उनले २२ बलमा २ छक्का प्रहार गरे।
केगान लिओनले १८ बलमा २ चौकासहित १६ रन बनाउँदा ओपनर माहिर जोशेफ १५ र ओरापेलेंग मोटल्होरिङ ११ रनमा आउट भए।
दक्षिण अफ्रिकाका अन्य ब्याटरले भने दोहोरो अंकमा रन बटुल्न सकेनन्। केन्याका अर्णभ पटेलले सर्वाधिक ५ विकेट लिए।
३ ओभर बलिङ गरेका उनले १५ रन खर्चिए। लुकास ओलुओच र शेम न्गोचेले २/२ विकेट लिँदा जेरार्ड मवेंडवाको नाममा १ विकेट रह्यो।
त्यसअघि अचिमोटा सिनियर सेकेन्डरी स्कुलमा टस जितेर पहिला ब्याटिङ रोजेको केन्याले निर्धारित २० ओभरमा ६ विकेट गुमाउँदै १४१ रन बनाएको थियो।
केन्याका कोलिन्स ओबुयाले अर्धशतक प्रहार गरे। उनले ४७ बलमा ७ चौका र २ छक्कासहित ५८ रन बनाए।
कप्तान राकेप पटेलले २५ बलमा ४ चौकासहित २८ रन बनाउँदा नील मुगाबे १६, नेल्सन ओधियाम्बो १४ र सुखदीप सिंहले १० रन बनाए।
दक्षिण अफ्रिकाका हेनरिक पिटरसेले सर्वाधिक २ विकेट लिए। उनले ४ ओभर बलिङ गर्दै २३ रन खर्चिए।
डिलिन बेस्टर, जेसी प्रोडेहल र जेसन राउबेनहाइमरको नाममा १/१ विकेट रह्यो। जारी प्रतियोगितामा केन्याको यो पहिलो जित हो। पहिलो खेलमा केन्या युगान्डासँग ७२ रनले पराजित भएको थियो।
समूह ए मा रहेको युगान्डा शतप्रतिशत जितसहित ४ अंक जोड्दै शीर्ष स्थानमा छन्। समान २ खेल खेलेको दक्षिण अफ्रिका र केन्याको २/२ अंक छ भने धानाले खाता खोल्न सकेको छैन।
अर्को समूहमा भने जिम्बाबे, तान्जेनिया, नाइजेरी र नामिबिया छन्। जिम्बाबे २ खेलबाट ४ अंकसहित शीर्ष स्थानमा छ भने समान खेल खेलेको तान्जिनिया र नाइजेरीयाको २/२ अंक छ। नामिबियाले भने जितविहीन छ।
