काठमाडौं । थाईल्याण्डमा हुने अन्तराष्ट्रिय टी ट्वान्टी क्रिकेट प्रतियोगिता र फेब्रुअरीमा हुने महिला विश्वकपको एसिया छनोटका लागि नेपाली राष्ट्रिय महिला क्रिकेट टिमको प्रशिक्षण आगामी बिहिबारबाट सुरु हुने भएको छ ।
अन्तराष्ट्रिय क्रिकेट परिषद आईसीसीले प्रतियोगिता तयारीको सम्पुर्ण व्यवस्था मिलाएपछि नेपाली महिला टिमको तयारी काठमाडौंको त्रिवि मैदानमा आगामी बिहिबार सुरु हुने भएको हो ।
महिला टिमको प्रशिक्षणको सम्पुर्ण जिम्मेवारी पुर्व कप्तान तथा प्रशिक्षक बिनोद दासले पाएका छन् । दासकै प्रशिक्षणमा नेपाली टिमले थाईल्याण्डमा हुने प्रतियोगिता र महिला विश्वकपको एसिया छनोट खेल्नेछ ।
आईसीसीकी नेपाल प्रतिनिधि भावना घिमिरेका अनुसार महिला टिमको छनोटको जिम्मेवारी प्रशिक्षक दाससंगै पुर्व प्रशिक्षक राजु बस्न्यात र राष्ट्रिय पुरुष टिमका मुख्य प्रशिक्षक जगत टमाटालाई दिईएको छ ।
५० बढी खेलाडीलाई महिला टिमको बन्द प्रशिक्षणमा समावेश गरिनेछ ।
नेपालले अगामी जनवरी १२ देखि १८ तारिखसम्म थाईल्याण्डमा टी ट्वान्टी स्मास प्रतियोगिता खेल्नेछ । त्यस्तै, थाईल्याण्डमै फेब्रुअरी १८ देखि २७ सम्म महिला विश्वकप क्रिकेटको एसिया छनोट खेल्नेछ ।
