काठमाडौं। फ्रान्सको राष्ट्रिय टोलीमा पुनः फर्कने आफ्नो सपना रहेको पल पोग्बाले बताएका छन्।
सन् २०१८ को विश्वकप विजेता पोग्बाले फ्रान्सेली जर्सीमा ९१ खेल खेलेका छन्। तर, उनी मार्च २०२२ पछि चोटपटक र डोपिङ प्रतिबन्धका कारण ‘ले ब्लु’ का लागि मैदानमा उत्रिएका छैनन्। उनलाई साढे १८ महिनाको प्रतिबन्ध लगाइएको थियो। तर, चार महिनाअघि मात्र उनको उक्त प्रतिबन्ध समाप्त भएको थियो।
३२ वर्षीय पोग्बाले भने,‘हरेक फ्रेन्च खेलाडीको सपना राष्ट्रिय टोलीमा खेल्ने नै हो। तर, त्यसका लागि विभिन्न चरणहरू पार गर्नुपर्छ। अहिले म पहिलो चरणमा छु। मेरो लक्ष्य मैदानमा फर्कने र राम्रो प्रदर्शन गर्ने।’
पोग्बाको अनुपस्थितिमा फ्रान्सले सन् २०२२ को विश्वकपको फाइनलसम्मको यात्रा तय गरेको थियो। तर, अर्जेन्टिनासँग पेनाल्टी सुटआउटमा पराजित भयो। त्यसपछि युरोपियन च्याम्पियनसिप २०२४ को सेमिफाइनलमा पुगेको फ्रान्स स्पेनसँग २-१ ले पराजित भयो।
पोग्बाले गत शनिबार लिग १ क्लब मोनाकोसँग दुई वर्षको सम्झौतामा हस्ताक्षर गरेका थिए। उनले आफ्नो करिअर पुनः सुरु गर्ने उद्देश्यले फ्रान्समै पहिलोपटक क्लब फुटबल खेल्ने भएका छन्।
म्यानचेस्टर युनाइटेड पूर्वखेलाडी पोग्बाले पछिल्ला तीन सिजनमा जम्मा १२ खेल मात्र खेलेका थिए। चोट, निलम्बन र एक ठगी घटनामा पीडित बनेपछि उनको करिअरमा ठूलो असर परेको थियो।
सन् २०२३ को अगस्टमा युभेन्ट्सबाट खेलेको एक खेलपछि उनको डोप टेस्ट असफल भएपछि प्रतिबन्ध लगाइएको थियो। त्यसै क्रममा युभेन्ट्सले उनको सम्झौता पनि तोडेको थियो।
सन् २०२४ मा उनका दाजु माथियास पोग्बालाई १ करोड ३० लाख युरो (करिब १५.३ मिलियन अमेरिकी डलर) ठगी गर्ने योजनामा संलग्न भएको आरोपमा तीन वर्षको सजाय सुनाइएको थियो।
-1751597995.webp)
-1751593454.webp)
