काठमाडौं । पारस खड्काको कप्तानीमा रहेको साविकको विजेता विराटनगर वारिवर्सले तेस्रो संस्करणको टिभिएस एभरेष्ट प्रिमियर लिग (ईपीएल) टी-ट्वान्टी क्रिकेटमा लगातार दोस्रो जित निकालेको छ ।
किर्तिपुरस्थित टियु क्रिकेट मैदानमा मंगलबार केली कोएट्जरको कप्तानीमा रहेको पोखरालाई सुपर ओभरमा पराजित गर्दै विराटनगरले लगातार दोस्रो जित निकालेको हो ।
पोखराले दिएको ८५ रनको लक्ष्यसहित जवाफी ब्याटिङ गरेको विराटनगरले १९ ओभर ३ बलमा अलआउट हुँदै ८४ रन जोडेपछि खेल सुपर ओभरमा गएको थियो ।
सुपर ओभरमा विराटनगरले २० रन जोड्दै २१ रनको लक्ष्य दिएको थियो । विराटनगरको लागि करण केसीले २० रन जोडे । जवाफमा पोखराले १३ रन बनाउन सक्यो ।
सुपर ओभरमा जानु अघि खराब सुरुवात गर्दै दुई ओभरमै २ विकेट गुमाएको विराटनगरका लागि आसिफ शेखले १९ तथा करण केसीले १५ रन जोडे । यस्तै रोविन क्षेत्री र हरि चौहानले समान १२/१२ जोड्दा भान डेर मेर्वीले ११ रन जोडे । कप्तान पारस मात्र १ रनमा आउट भए ।
पोखराका विपिन खत्रीले ३ तथा सुसन भारी, बिक्रम सोब र पाउल कलीनले समान २/२ विकेट लिए ।
यसअघि टस हारेर पहिले ब्याटिङ गरेको पोखराले पुरै २० ओभर खेल्दै ७ विकेट गुमाएर ८४ रन बनाएको थियो । विदेशी ब्याट्सम्यान चल्न नसक्दा विराटनगरविरुद्ध पोखराले उच्च स्कोर बनाउन सकेन् ।
खराब सुरुवात गरेको पोखराले मात्र १९ रन जोड्दा महत्वपूर्ण ४ विकेट गुमाएको थियो । सुरुवाती दुई खेलमा अर्धशतकीय इनिङस खेलेका रिचर्ड लेभी मात्र ३ रनमा आउट भए । यस्तै कप्तान कप्तान कोएट्जर ४ रनमा आउट भए ।
पोखराका लागि पाउल कलीनले सर्वाधिक २० रन जोडे । यस्तै राजेश पुलामी मगरले १७ रन जोडे । विराटनगरका पाउल भान मिकेरिनले ३ तथा भान डेर मेर्वीले २ विकेट लिए ।
जितसंगै विराटनगरले २ खेलबाट ४ अंक जोडेको छ । र, विराटनगरले दोस्रो चरण पुग्ने सम्भावना बलियो बनाएको छ । विराटनगरले पहिलो खेलमा ललितपुर प्याट्रीयट्सलाई पराजित गरेको थियो ।
पोखराको भने यो लगातार तेस्रो हार हो । तेस्रो हारसंगै पोखराको अर्को चरणको यात्रा कमजोर बनेको छ । पोखराको अर्को चरण गणितीय सम्भावना बाँकी रहेको छ । पोखरा पहिलो खेलमा भैरहवा र दोस्रो खेलमा ललितपुरसंग पराजित भएको थियो ।
-1746894755.jpeg)
