काठमाडौं । ज्ञानेन्द्र मल्लको कप्तानीमा रहेको ललितपुर प्याट्रियट्सले टिभिएस एभरेष्ट प्रिमियर लिग (ईपीएल) टी–ट्वान्टी क्रिकेटमा लगातार दोस्रो जित निकालेको छ ।
टियु क्रिकेट मैदानमा भारतीय ब्याट्सम्यान गौरव तमोर र जय किशन कोल्शावाला चम्किएपछि ललितपुरले सोमबार पोखरा राइनोजलाई ८ विकेटले हराउँदै दोस्रो जित निकालेको हो ।
तमोर र कोल्शावालाले अर्धशतकीय इनिङस खेलेपछि केली कोएट्जरको पोखराले दिएको १६७ रनको लक्ष्य ललितपुरले १५ ओभर ५ बलमा मात्र २ विकेट गुमाएर पुरा गर्यो ।
ललितपुरको जितमा विस्फोटक ब्याटिङ्ग गर्दै प्लेयर अफ दि म्याच समेत बनेका तमोरले ८२ रनको योगदान दिए । तमोरले ४१ बलमा ४ चौका र ८ छक्का प्रहार गरे । यस्तै कोल्शावालाले ३८ बलमा ५१ रन जोडे । दुवैले पहिलो विकेटका लागि १२९ रनको साझेदारी गरेका थिए ।
यस्तै ललितपुरका सन्नी पटेल २० तथा सोनु तामाङ ११ रनमा अविजित रहे । पोखराका सुसन भारी र पाउल कालिङले एक एक विकेट लिए ।
यसअघि दक्षिण अफ्रिकन ब्याट्सम्यान रिचर्ड लेभीले अर्धशतकीय इनिङस खेलेपछि टस जितेर पहिले ब्याटिङ गरेको पोखराले पुरै २० ओभरमा ४ विकेट गुमाएर १६६ रनको योगफल तयार गरेको थियो । पोखराका लागि लेभीले ८४ रनको योगदान गरे ।
आक्रामक ब्याटिङ गरेका ओपनर लेभीले ३९ बलमा ३ चौका र ९ छक्का प्रहार गरे । लेभीको यो लगातार दोस्रो खेलमा अर्धशतक हो । लेभीले पहिलो खेलमा भैरहवा ग्लाडीयटर्सविरुद्ध ७९ रन जोडेका थिए ।
पोखराका लागि लेभीले कप्तान केली कोएट्जरसंग पहिलो विकेटका लागि ९७ रनको साझेदारी गरेका थिए । कोएट्जर १९ रनमा आउट भए ।
यस्तै पोखराका लागि विनोद भण्डारीले अविजित ३४ रन जोड्दा सुनिल धमलाले १० रन जोडे । ललितपुरका पवन सर्राफले ३ विकेट लिए ।
लगातार दोस्रो जित निकालेसंगै ललितपुर लिगको शीर्ष स्थानमा उक्लिएको छ । ललितपुरले ३ खेलबाट ४ अंक जोडेको छ । पहिलो खेलमा विराटनगरसंग पराजित भएको ललितपुरले दोस्रो खेलमा चितवन टाइगर्सलाई हराएको थियो ।
पोखराको भने यो लगातार दोस्रो हार हो । पहिलो खेलमा पोखरा भैरहवासंग पराजित भएको थियो । पोखरा लिगको पुछारमा छ ।
-1751597995.webp)
