काठमाडौं । सोमपाल कामीको कप्तानीमा रहेको काठमाडौं किङस इलाभेनले तेस्रो संस्करणको टिभिएस एभरेष्ट प्रिमियर लिग (ईपीएल) टी–ट्वान्टी क्रिकेटमा विजयी सुरुवात गरेको छ ।
सोमबार भयेक खेलमा पृथु बास्कोटाको कप्तानीमा रहेको चितवन टाइगर्सलाई ६ विकेटले हराएर काठमाडौंले सुखद सुरुवात गरेको हो ।
टियु क्रिकेट मैदानमा चितवनले दिएको १६१ रनको लक्ष्य काठमाडौंले १८ ओभर ५ बलमा मात्र ४ विकेट गुमाएर पुरा गर्यो ।काठमाडौंको जितमा भारतीय खेलाडी सुब्रमनियन आनन्दले १८ बलमा अविजित ४३ रन जोडे । सुब्रमनियन प्लेयर अफ दि म्याच चुनिए । यस्तै अमर सिंह रौटेला २१ रनमा अविजित रहे ।
त्यस्तै काठमाडौंका लागि सागर पुनले ३९ रन जोड्दा नरेश बुढाएरले २२ तथा अमित श्रेष्ठले १८ रन जोडे । चितवनका साहब आलमले २ विकेट लिए ।
यसअघि टस हारेर पहिले ब्याटिङ गरेको चितवनले १९ ओभर ५ बलमा अलआउट हुँदै १६० रन बनाएको थियो ।
चितवनका लागि दिपेन्द्र सिंह ऐरीले ४५ रन जोड्दा पल स्टर्लिङले ३४ रनको योगदान दिए । यस्तै सन्दीप सुनारले २५ तथा पृथु बास्कोटा २० रनमा अविजित रहे ।
काठमाडौंका संसद सेख र प्रदीप साहुले ३/३ विकेट लिए ।
जितसंगै काठमाडौंले २ अंक जोडेको छ । चितवनले भने लगातार दोस्रो हार व्यहोरेको छ । चितवनले २ खेलबाट अंक जोड्न सकेको छैन ।
यसअघि पहिलो खेलमा चितवन ललितपुर प्याट्रीयट्ससंग ११ रनले पराजित भएको थियो ।
-1746894755.jpeg)
