काठमाडौं । शरद भेषवाकरको कप्तानीमा रहेको भैरहवा ग्लाडीयटर्सले तेस्रो संस्करणको टिभिएस एभरेष्ट प्रिमियर लिग (ईपीएल) टी–ट्वान्टी क्रिकेटमा विजयी सुरुवात गरेको छ ।
आइतबार भएको रोमान्चक खेलमा काइल जेम्स कोट्जरको कप्तानीमा रहेको पोखरा राइनोजलाई ४ विकेटले पराजित गर्दै भैरहवाले सुखद सुरुवात गरेको हो ।
टियु क्रिकेट मैदानमा भारतीय ब्याट्सम्यान रबी इन्द्रर सिंहले शतकीय इनिङस खेलेपछि पोखराले दिएको २१६ रनको फराकिलो लक्ष्य भैरहवाले १९ ओभर ४ बलमा ६ विकेट गुमाएर पुरा गर्यो ।
भैरहवाको जितमा रबीले अविजित १२५ रन जोडे । ४७ बलमा शतक पुरा गरेका रबीले ६० बलमा १० छक्का ८ चौका प्रहार गरे । यस्तै भैरहवाका लागि आरिफ शेखले २३ रन जोड्दा पुनित मेहेराले अविजित १८ रन जोडे ।
पोखराका सुशन भारी, बिक्रम सोब र पल कोगलिङले समान २/२ विकेट लिए ।
यसअघि टस जितेर पहिले ब्याटिङ गरेको पोखराले पुरै २० ओभर खेल्दै ५ विकेट गुमाएर २१५ रन जोडेको थियो । जारी ईपीएलको यो सर्वाधिक ठुलो स्कोर हो ।
पोखराको उच्च स्कोरमा दक्षिण अफ्रिकन खेलाडी रिचर्ड लेभीले ७९ रनको अर्धशतकीय इनिङस खेले । विस्फोटक ब्याटिङ गरेका लेभीले ३६ बलमा ७ चौका र ७ छक्का प्रहार गरे । यस्तै केली जेम्स कोट्जरले ४७ रन जोड्दा सुनील धमलाले ३८ रन जोडे ।
भैरहवाका कृष्ण कार्की, रायन टेन, अविनास बोहोरा र पुनित मेहेराले एक एक विकेट लिए ।
जितसंगै भैरहवाले २ अंक जोडेको छ । भैरहवा साबिकको उपविजेता समेत हो । पोखराले भने हारबाट लिगको सुरुवात गरेको छ ।
लिग अन्तर्गत सोमबार चितवन टाइगर्स र काठमाडौं किङस तथा पोखरा राइनोज र ललितपुर प्याट्रियट्सबीच खेल हुनेछ ।
-1746894755.jpeg)
