धनगढी । लिटिल फ्लावर धनगढी र लिटिल बुद्ध महेन्द्रनगरले धनगढीमा जारी तेस्रो लिटिल फ्लावर प्रिमियर लिग क्रिकेटको फाइनलमा प्रतिस्पर्धा गर्ने भएका छन् ।
सोमबार भएको पहिलो सेमिफाइनलमा साविक विजेता सिद्धार्थ सिसु सदनलाई ५ विकेटले पराजित गर्दै लिटिल फ्लावरले फाइनलमा स्थान बनाएको हो ।
टस जितेर पहिला ब्याटिङ गरेको सिद्धार्थले २० ओभरमा ८ विकेट गुमाउँदै १०२ रन जोडेको थियो । सिद्धार्थका लागि गजेन्द्र बोहराले सर्वाधिक ३९, खडक बोहराले २२, सुविन महराले १३ र सुरेन्द्र साउँदले १२ रन बनाए । सिद्धार्थलाई सस्तैमा समेट्ने क्रममा लिटिल फ्लावरका शेर मल्लले ४ ओभरमा १८ रन खर्चेर ४ विकेट लिए ।
सिद्धार्थले दिएको १०३ रनको लक्ष्य लिटिल फ्लावरले १७ ओभर २ बलमा मात्र ५ विकेट गुमाउँदै पुरा गर्यो । लिटिल फ्लावरको जितमा सुरज तिरुवाले अविजित ५१ तथा शैलेश अवस्थीले २० रन बनाए । सिद्धार्थका कप्तान शैलेश जिसीले ३ विकेट लिए ।
यस्तै दोस्रो सेमिफाइनलमा हिमालयन ह्वाईट हाउस काठमाण्डौंलाई १३ रनले पराजित गर्दै लिटिल बुद्धले लिटिल फ्लावरसंगको भेट पक्का गरेको हो ।
टस जितेर पहिले ब्याटिङ गरेको लिटिल बुद्धले १९ ओभर १ बलमा अलआउट हुँदै १५० रन बनाएको थियो । लिटिल बुद्धका लागि नारायण जोशीले ५९ तथा हेमन्त कार्कीले ३९ रन बनाए । हिमालयन ह्वाईट हाउसको लागि अंकित सुवेदी र शुशान्त सिहले ३÷३ विकेट लिए ।
लिटिल बुद्धले दिएको १५१ रनको लक्ष्य पछ्याएको हिमालयन ह्वाईट हाउसले पुरै २० ओभर खेल्दै ७ विकेट गुमाउँदै १३७ रन मात्रै बनाउन सक्यो । हिमालयनका लागि अकित सुवेदीले २७ तथा सन्जय श्रेष्ठले २१ रन जोडे । लिटिल बुद्धका रोचक ऐरले ३ विकेट लिए ।
फाइनल खेल मंगलबार हुनेछ । विजेताले १ लाख ११ हजार १ सय ११ प्राप्त गर्नेछ । उपविजेताले ५५ हजार ५ सय ५५ पाउने छन् । प्रतियोगिताको उत्कृष्ट खेलाडीले १० हजार, उत्कृष्ट व्याट्सम्यान, उत्कृष्ट वलर र उदयमान खेलाडीलाई नगद ५ हजार पाउने छन् ।
-1751205100.jpg)
-1751726411.jpg)
