धनगढी । लिटिल फ्लावर वोर्डिङ स्कुल धनगढी र विज्डम एकेडेमी बेलौरी कञ्चनपुरले धनगढीमा जारी देशकै सर्वाधिक धनराशीको निष्ट कलेज लिटिल फ्लावर प्रिमियर लिग क्रिकेटमा जित निकालेका छन् ।
संघीय प्रहरी कार्यालयको खेल मैदानमा शुक्रबार लिटिल फ्लावरले शारदा माविलाई २० रनले हराएको हो । यस्तै विज्डम एकेडेमीले काठमाण्डौंको हिमालय ह्वाईट हाउस स्कुललाई ४ विकेटले पराजित गर्यो ।
टस जितेर पहिला ब्याटिङ गरेको लिटिल फ्लावरले निर्धारित २० ओभरमा ७ विकेट गुमाउँदै १४५ रन बनाएको थियो । लिटिल फ्लावरका लागि कप्तान विपिन रावलले ५६, शेर मल्लले अविजित २५, सुरज तिरुवाले २१, अनिल थापाले १४ र विशाल भट्टले १० रनको योगदान दिए ।
लिटल फ्लावरले दिएको १४६ रनको लक्ष्य पछ्याउँदै जवाफी व्याटिङ गरेको शारदाले २० ओभरमा ८ विकेट गुमाउँदै १२५ रन मात्र बनाउन सक्यो । उसका लागि राजन सिंहले ५१, राहुल भन्डारीले १९ र कप्तान सिप्टन अन्सारीले १३ रनको योगदान दिए पनि टिमलाई जित दिलाउन सकेनन । लिटिल फ्लावरलाई जिताउन शेर मल्ल र दिपक रोकायाले २/२ विकेट लिए ।
समूह 'ए' मा रहेको लिटिल फ्लावरको यो पहिलो खेलमा पहिलो जित हो । लगातार दुई खेलमा पराजित शारदा मावि भने प्रतियोगिताबाट बाहिरिएको छ ।
प्रतियोगिता अन्तर्गत शुक्रबार ह्वाइट हाउसलाई ४ विकेटले पराजितगर्दै विज्डमले पहिलो जित निकालेको छ । जितसँगै विज्डमले अघिल्लो चरण प्रवेशको सम्भावनालाई कायम राखेको छ ।
टस हारेर पहिले ब्याटिङ गरेको ह्वाइट हाउसले १५ ओभरमा अलआउट हुँदै ८७ रन बनाएको थियो । ह्वाईट हाउसका लागि कप्तान सुशान्त सिहले २१, अरुण ऐरीले १६ र फ्रिदोस अन्सारीले १० रन जोडे । ह्वाईट हाउसलाई सस्तैमा समेट्ने क्रममा विज्डमका चन्द्र सिह कार्कीले ३, कैलाश ऐर र बसन्त सिंह कार्कीले २/२ विकेट लिए ।
ह्वाइट हाउसले दिएको ८८ रनको समान्य लक्ष्य विज्डमले १४ ओभर ५ बलमा ६ विकेट गुमाउँदै भेट्टयो । विज्डमको लागि कप्तान लोकेश बमले २४, बसन्त सिह कार्कीले १५ रन बनाए । ह्वाईट हाउसका अमृत सिह, शुसान्त सिह र रमेश भट्टले २/२ विकेट लिए ।
