काठमाडौं । तेस्रो संकरणको धनगढी प्रिमियर लिग (डीपीएल) टी-ट्वान्टी क्रिकेट माघको तेस्रो साताबाट सुरु हुने भएको छ । आयोजक धनगढी क्रिकेट एकेडमीले शुक्रबार पत्रकार सम्मेलन गर्दै प्रतियोगिता माघ १९ देखी फागुन ४ गतेसम्म आयोजना हुने जनाएको छ ।
प्रतियोगिताका सम्पुर्ण खेल धनगढीस्थित फाप्ला अन्तर्राष्ट्रिय क्रिकेट मैदानमा हुनेछ । प्रतियोगितामा ६ फ्रेन्चाईज टोलीले सहभागिता जनाउने छन् । सहभागि टिममा चौराहा धनगढी, सीवाईसी अत्तरीया, रुपन्देही च्यालेन्जर्स, महेन्द्रनगर युनाईटेड, काठमाडौं गोल्डेन र बिराटनगर किंग्स रहेका छन् ।
सहभागी ६ टोलीमा १५—१५ खेलाडी हुनेछन् । जुन अक्सनबाट छनोट गरिनेछ । त्यसमा दुई विदेशी र धनगढीमा हुने ट्यालेन्ट हन्टबाट आएका सुदूरपश्चिमका एक खेलाडी प्रत्येक टिममा अनिवार्य समावेश गर्नुपर्ने प्रावधान रहेको छ ।
प्रतियोगितामा कुल १९ खेल हुनेछ । लिग चरणमा प्रत्येक टिमले अन्य टिमसंग एक–एक खेल खेल्ने छन् । शीर्ष चार टोली प्ले–अफमा पुग्नेछन् । त्यसमा पहिलो र दोस्रो हुने टिमको विजेता फाइनल पुग्नेछ । त्यसमा पराजित हुने टोलीले तेस्रो र चौथो हुने टिमसंगको विजेतासंग फाइनल प्रवेशको लागि खेल्नेछ ।
प्रतियोगिताको मुख्य प्रायोजक विजय डिस्टिलरीको रुस्लान क्रिकेटले गर्ने भएको छ । विजयको तर्फबाट चीफ फाइनान्स अफिसर शतिस कर्ण र धनगढ़ी क्रिकेट एकेडमीका अध्यक्ष सुबास शाहीले सम्झौता पत्रमा हस्ताक्षर गरे ।
सम्झौतासंगै मुख्य प्रयोजक विजय डिस्टिलरीले आयोजकलाई १ करोड १० लाख रुपैयाँ उपलब्ध गराउनेछ । जसमा ८० प्रतिशत नगद पाउने अध्यक्ष शाहीले जानकारी गराए । सम्झौतासंगै प्रतियोगिताको नाम रुस्लान डिपीएल-३ भएको छ ।
विजय डिस्टिलरीका चीफ फाइनान्स अफिसर कर्णले नेपाली खेलकुद जगतमा पहिलोपटक सर्वाधिक ठुलो रकमको प्रायोजन गरेको जानकारी गराए । कार्यक्रमको दौरान प्रतियोगिताको लोगो र जर्सी समेत सार्वजनिक गरिएको थियो ।
यस संकरणको उपाधि विजेताले पाउने रकम भने खुलाईएको छैन । आयोजकले उक्त रकम पछि खुलाईने बताएको छ । गत सिजनको विजेताले २५ लाख पाएको थियो । गत सिजन फाइनलमा काठमाडौंलाई हराएर धनगढी च्याम्पियन भएको थियो ।
प्रतियोगिताको दौरान राष्ट्रिय तथा अन्तर्राष्ट्रिय प्रतियोगितामामा सहभागी १ पूर्व खेलाडीलाई ‘धनगढी क्रिकेट सम्मान’ तथा नेपाली क्रिकेटमा महत्वपूर्ण योगदान १ व्यक्तिलाई ‘अर्जुन खड्का स्मृति सम्मान’ स्वरुप १—१ लाख रुपैयाँ प्रदान गरिने छन् ।
प्रतियोगितामा दर्शकहरुका लागि टिकटदर लिग चरणमा ५०, प्ले—अफमा ७० र फाइनलमा १०० रुपैया राखिएको छ । टिकट बिक्रीको २० प्रतिशत रकम फाप्ला अन्तर्राष्ट्रिय निर्माण अभियान (ड्रिम फाप्ला) लाई छुट्याइनेछ ।
