धनगढी । कैलाली मोडल ईङ्गलिस बोर्डिङ स्कुल धनगढी र एबीसी स्कुल नेपालगंजले धनगढीमा जारी तेस्रो निष्ट कलेज लिटिल फ्लावर प्रिमियर लिग क्रिकेटमा जित हासिल गरेका छन् ।
देशकै सर्वाधिक धनराशीको विद्यालय स्तरीय क्रिकेट प्रतियोगिता अन्तर्गत बुधबार कैलाली मोडलले विस्जम एकेडेमी कंचनपुरलाई ६ विकेटले पराजित गर्यो । यस्तै एबीसीले काठमाण्डौंको मोक्छदा स्कुलाई ७ रनले हरायो ।
टस जितेर पहिला ब्याटिङ गरेको विस्डमले २० ओभरमा ८ विकेट गुमाउँदै १७१ रनको योगफल बनाएको थियो । विस्डमको लागि प्रकाश जोशीले ५७, किरन ठगुन्नाले ४० कप्तान लोकेश बमले २७, वसन्त सिह कार्कीले १७, सुशील पन्तले १४ रन बनाए । कैलाली मोडेलका कैलाश खातीले ३ र वसन्त थापाले २ विकेट लिए ।
विस्डमले दिएको १७२ रनको लक्ष्य कैलाली मोडलले ३ बल अगाबै ४ विकेट गुमाएर पुरा गर्यो । कैलाली मोडेललाई जिताउन सुवोध ऐरले सर्वाधिक ७४ रन जोडे । यस्तै कप्तान अजय बिष्टले ३७, अभिषेक पालले १९ र शोभित महताले १३ रनको योगदान दिए ।
यस्तै दोस्रो खेलमा टस जितेर पहिले ब्याटिङ गरेको एबीसीले १९ ओभर ३ बलमा अलआउट हुँदै १३७ रन बनाएको थियो । एबीसीका लागि विशाल केसीले २८, लवकुश यादवले २१, अमन अन्सारीले १४, कप्तान सदाव अन्सारी र सहिल वस्नेतले १३/१३ र बुद्ध अधिकारीले १२ रनको योगदान दिए । मोक्छदाका अनिश कार्कीले ४, विपिन खत्रीले ३, दिपक बोहराले २ विकेट लिए ।
एबिसीले दिएको १३८ रनको लक्ष्य पछ्याएको मोक्छदाले पुरै २० ओभर खेल्दै ९ विकेट गुमाएर १३० रन मात्रै बनाउन सक्यो । उसका लागि दिपक बोहोराले ३६, विशाल लिम्बुले ३४, कप्तान विपिन खत्रीले २७ र सुदिप बस्नेतले १६ रन बनाए पनि टिमलाई जित दिलाउन सकेनन् । एबीसीका लागि सुभम ब , कप्तान सदाव अन्सारी र सोनु थापा मगरले २/२ विकेट लिए ।
संस्कार क्रिकेट एकेडेमी धनगढीको आयोजनामा धनगढीमा भईरहेको प्रतियोगिताको विजेताले १ लाख ११ हजार १ सय ११ प्राप्त गर्नेछ। उपविजेताले ५५ हजार ५ सय ५५ नगदका साथै ट्रफी पाउने छन्। प्रतियोगिताको उत्कृष्ट खेलाडीले नगद १० हजार, उत्कृष्ट व्याट्सम्यान, उत्कृष्ट वलर र उदयमान खेलाडीलाई नगद ५ हजार सहित ट्रफी प्रदान गरिने छ ।
