काठमाडौं । नेपालका तीन राष्ट्रिय क्रिकेट खेलाडीले अन्तर्राष्ट्रिय क्रिकेट परिषद (आईसिसी) को टी-ट्वान्टी वरीयतामा स्थान बनाएका छन् ।
आईसिसीले सार्वजनिक गरेको नयाँ वरीयताको शीर्ष सय भित्र नेपालका तीन खेलाडी अटाएका छन् । आईसिसीबाट एकदिवसीय र टी-ट्वान्टी मान्यता पाएपछि नेपालका खेलाडीहरु वरीयतामा नियमित पर्न थालेका हुन् ।
आईसिसीले जारी गरेको वरीयतामा ब्याटिङ, बलिङ र अलराउन्डरमा नेपालका खेलाडी अटाएका छन् । वरीयताको ब्याटिङतर्फ कप्तान पारस खड्का ९३ औं स्थानमा रहेका छन् । २६५ अंक पाएका पारस यसअघि ९० औं स्थानमा रहेका थिए । नेपालका शरद भेषवाकर भने ब्याटिङ वरीयताबाट बाहिरिएका छन् ।
यस्तै कप्तान पारस अलराउन्डरतर्फ शीर्ष ५० भित्र अटाएका छन् । पारसले ६८ अंकसहित ४१ औं स्थान हात पारेका छन् । अलराउन्डरतर्फ नेपालकै सोमपाल कामी पनि शीर्ष १०० भित्र परेका छन् । सोमपाल ४२ अंकसहित ६४ औं स्थानमा छन् ।
बलिङतर्फ नेपालका बसन्त रेग्मी र सोमपाल कामी शीर्ष १०० भित्र अटाएका छन् । बसन्त ३९७ अंक प्राप्त गर्दै ७५ औं स्थानमा रहेको छन् । यस्तै ३३८ अंक जोडेका सोमपाल ९४ औं स्थानमा रहेका छन् ।
आईसिसीको टी-ट्वान्टी ब्याटिङ वरीयताको शीर्ष स्थानमा पाकिस्तानका बाबर आजम, दोस्रो स्थानमा अष्ट्रेलियाका आरोन फिन्च रहेका छन् । त्यस्तै न्युजिल्याण्डका कोलिन मुन्द्रो तेस्रो, भारतका लोकेस राहुल चौथो र पाकिस्तानका फकर जमान पाँचौं स्थानमा रहेका छन् ।
बलिङतर्फ अफगानिस्तानका राशिद खान पहिलो स्थानमा रहदा पाकिस्तानका शदाब खान दोस्रो स्थानमा रहेका छन् । इंग्ल्यान्डका आदील राशिद तेस्रो, भारतका युजभेन्द्र चाहल चौथो र न्युजिल्याण्डका इश सोधी पाँचौं स्थानमा रहेका छन् ।
अलराउन्डरतर्फ अष्ट्रेलिया ग्लेन म्याक्सवेल शीर्ष स्थानमा रहदा अफगानिस्तानका मोहमद नाबी दोस्रो स्थानमा रहेका छन् । यस्तै बंगलादेशका शाकिब अल हसन तेस्रो, दक्षिण अफ्रीकाका जेपी दुमिनी चौथों र श्रीलंकाका थिसरा परेरा पाँचौ स्थानमा रहेका छन् ।
