एजेन्सी । इंग्लिश प्रिमियर लिग फुटबलमा आज (आइतबार) विभिन्न ४ खेलहरु हुँदैछ । जसमा प्रिमियर लिगका ठुला क्लबहरुले प्रतिस्पर्धा गर्नेछन् ।
प्रिमियर लिगको बहुचर्चित म्यानचेस्टर डर्बी भिडन्त आजै हुँदैछ । नेपाली समय अनुसार राति १०:१५ मा सुरु हुने डर्बी भिडन्तमा सिटीले युनाइटेडलाई घरेलु मैदानमा आथित्यता प्रदान गर्दैछ । र, लिगको शीर्ष स्थानको सिटी र आठौं स्थानको युनाइटेडबीचको भिडन्त निकै रोमान्चक हुने आशा गरिएको छ ।
पेप ग्वार्डीवालाको टिम सिटी घरेलु मैदानमा युनाइटेडविरुद्ध जित निकाल्दै आफ्नो शीर्ष स्थान यथावत राख्न चाहन्छ । सिटीले ११ खेलबाट २९ अंक जोडेको छ । सिटीको पछिल्लो लय हेर्दा युनाइटेडविरुद्ध उसलाई गार्हो पर्नेछैन ।
यता, लिगमा लय समात्न नसकेको जोसे मोउरिन्होको युनाइटेड सिटीलाई उसैको मैदानमा हार चखाउन चाहन्छ । तर, निकै लयमा रहेको सिटीविरुद्ध युनाइटेडलाई कठिन हुने देखिन्छ । यो सिजन ६ खेलमा जित निकालेको युनाइटेडले २० अंक जोडेको छ ।
प्रिमियर लिग अन्तर्गत नै आज दोस्रो स्थानको चेल्सीले एभर्टनसंग घरेलु मैदानमा खेल्दैछ । उक्त खेल नेपाली समय अनुसार ८ बजे सुरु हुनेछ ।
त्यस्तै तेस्रो स्थानको लिभरपुलले घरेलु मैदानमा फुलहमको सामना गर्दैछ । दुई टोलीबीचको खेल नेपाली समय अनुसार ५:४५ मा हुनेछ ।
प्रिमियर लिगमै आर्सनलले वुल्भ्ससंग प्रतिस्पर्धा गर्नेछ । आर्सनल र वुल्भ्सबीचको खेल राति १०:१५ मा सुरु हुनेछ ।
