पोखरा । चितवन राइनोजले सर्वाधिक पुरस्कार राशीको नमस्ते पोखरा प्रिमियर लिग (पीपीएल) टी–ट्वान्टी क्रिकेटको दोस्रो चरणमा स्थान बनाएको छ ।
शनिबार भएको लिग चरणको अन्तिम खेलमा खेलमा चितवनले विराटनगर टाईटन्सलाई ४ विकेटले हराएर दोस्रो चरणमा स्थान पक्का गरेको हो ।
पोखरा रंगशालामा विराटनगरले दिएको १४६ रनको लक्ष्य चितवनले १९ ओभर ३ बलमा ६ विकेट गुमाएर पुरा गर्यो ।
खराब सुरुवात गरेको चितवनको जितमा सन्नी पटेल ले ५१ रनको अर्धशतकीय इनिङ खेले । त्यस्तै आरिफ शेखले ३५, स्मित पटेलले २१ र अनिल कुमार साहले १२ रन जोडे । सोनु तामाङ ११ रनमा अविजित रहे ।
विराटनगरका लागि कप्तान सन्दीप लामिछानेले ४ विकेट लिए ।
यसअघि टस जितेर पहिले ब्याटिङ गरेको विराटनगरले पुरै २० ओभर खेल्दै ५ विकेट गुमाएर १४५ रन जोडेको थियो । उत्कृष्ट सुरुवात गरेको विराटनगरका लागि मोहमद जायद आलमले अर्धशतक बनाए ।
आलमले ५१ रन जोडे । आलमले पहिलो विकेटका लागि सुनिल धमलासंग ७८ रनको साझेदारी गरेका थिए । धमला ४७ रनमा आउट भए ।
त्यस्तै प्रदिप सिंह ऐरीले ११ रन जोडे । चितवनका कप्तान पारस र स्मित पटेलले २/२ विकेट लिए ।
जितसंगै चितवन शीर्ष तीनमा रहदै एलिमिनेटर (प्ले अफ) मा स्थान पक्का बनाएको छ । चितवनले ५ खेलबाट ६ अंक जोडेको छ ।
अब चितवनले एलिमिनेटरमा हुलास काठमाडौं रोयल्ससंग आइतबार खेल्नेछ ।
पोखरा पल्टन शीर्ष स्थानमा रहदै फाइनलमा पुगेको छ ।
