पोखरा । सर्वाधिक पुरस्कार राशीको नमस्ते पोखरा प्रिमियर लिग (पीपीएल) टी–ट्वान्टी क्रिकेट अन्तर्गत लिग चरणको अन्तिम खेलमा विराटनगर टाईटन्सले चितवन राइनोजलाई जितका लागि १४६ रनको लक्ष्य दिएको छ ।
पोखरा रंगशालामा टस जितेर पहिले ब्याटिङ गरेको सन्दीप लामिछानेको विराटनगरले पुरै २० ओभर खेल्दै ५ विकेट गुमाएर १४५ रन जोडेको छ । विराटनगरले दिएको १४६ रनको लक्ष्यसहित पारस खड्काको चितवनले केहि बेरमा जवाफी ब्याटिङ गर्नेछ ।
उत्कृष्ट सुरुवात गरेको विराटनगरका लागि मोहमद जायद आलमले अर्धशतक बनाए । आलमले ५१ रन जोडे । आलमले पहिलो विकेटका लागि सुनिल धमलासंग ७८ रनको साझेदारी गरेका थिए । धमला ४७ रनमा आउट भए । त्यस्तै प्रदिप सिंह ऐरीले ११ रन जोडे ।
चितवनका कप्तान पारस र स्मित पटेलले २/२ विकेट लिए ।
प्रतियोगिताको दोस्रो चरणमा पुग्न चितवनका लागि महत्वपूर्ण रहेको छ । चितवनले ४ खेलबाट ४ अंक जोडेको छ । र, चितवनलाई दोस्रो चरणमा पुग्न जित्नै पर्ने दबाब रहेको छ । चितवनले आज विराटनगरलाई पराजित गरेमा उसको ६ अंक हुनेछ ।
विराटनगरको भने प्ले अफ सम्भावना सकिएको छ । ४ खेलबाट २ अंक जोडेको विराटनगर बाहिरिसकेको छ । आज भएको पहिलो खेलमा पोखरा पल्टनले हुलास काठमाडौं रोयल्सलाई हराएसंगै विराटनगर बाहिरिएको हो । विराटनगरसंगै बुटवल ब्लास्टर्सको पनि बाहिरिएको छ ।
