एजेन्सी । स्पेनिस महारथी रियल मड्रिडले मुख्य प्रशिक्षक जुलेन लुपेटेगुई मंगलबार बर्खास्त गर्यो । निरन्तरको खराब नतिजापछि रियलले छोटो समयमै लुपेटेगुईलाई हटाउने निर्णय गरेको थियो ।
सिजनको पहिलो एल क्लासिकोमा कप्तान लियोनल मेस्सीबिनाको बार्सिलोनासंग लज्जास्पद हार ब्यहोरेपछि रियलले लुपेटेगुईलाई बर्खास्त गरेको हो ।
रुस विश्वकपको दौरान जिनेदान जिदानले क्लब छाडेपछि रियलले लुपेटेगुईलाई मुख्य प्रशिक्षकको जिम्मेवारी दिएको थियो । जतिबेला लुपेटेगुई स्पेनिस राष्ट्रिय टिमको मुख्य प्रशिक्षक रहेका थिए । तर, रियलको प्रशिक्षक नियुक्त भएसंगै स्पेनले उनलाई बर्खास्त गरेको थियो ।
स्पेनिस टोलीबाट बर्खास्त परेसंगै ठुलो महत्वकाक्षा लिएर रियल आएका लुपेटेगुईले क्लबमा कुनै जादु देखाउन सकेनन् । अन्तत: छोटो समयमै लुपेटेगुई बर्खास्तमा परे ।
लुपेटेगुईको बर्खास्तसंगै रियलले स्यान्टियागो सोलारीलाई कार्यबाहक प्रशिक्षक नियुक्त गरिसकेको छ । तर, यतिबेला रियलको बागडोर कसले सम्हाल्नेछन् त भन्ने चर्चा सुरु भईसकेको छ ।
अन्तर्राष्ट्रिय मिडियाहरुको अनुसार रियलको बागडोर सम्हाल्न सक्ने प्रशिक्षकको दौडमा चेल्सीका पुर्व प्रशिक्षक एन्टोनियो कोन्टे, बेल्जियमका प्रशिक्षक रोबर्टो मार्टिनेज, टोटेनहमका प्रशिक्षक माउरिसियो पोचेटिनो र स्यान्टियागो सोलारीको नाम चर्चामा छ ।
नतिजा र व्यक्तित्वको हिसाबले कोन्टेलाई रियलको बागडोर समाल्न सक्ने सम्भावित प्रशिक्षकको रुपमा हेरिएको छ । ईटाली र इङ्ल्याण्डको शीर्ष डिभिजनको लिग जितेका कोन्टेलाई रियलको दबाब थेप्न सक्ने प्रशिक्षकको रुपमा लिईएको छ ।
सोलारीलाई रियलको विरासत धान्ने अर्को प्रशिक्षकको रुपमा हेरिएको छ । रियलले उनलाई कार्यबाहक प्रशिक्षकको जिम्मेवारी दिईसकेको छ । सोलारीले जिदान रहदैबाट सिनियर टिमसंग काम गरिसकेका छन् । क्लबका बिषयमा सोलारी अरुभन्दा बढी जानकार रहेको मानिएको छ । यस्तै खेलाडीहरु पनि सोलारीलाई राख्न सहमत भएको बताईएको छ ।
बेल्जियमलाई विश्वकपको सेमिफाईनल पुर्याउन सफल प्रशिक्षक रोबर्टो मार्टिनेजलाई पनि रियलको भावी प्रशिक्षकको रुपमा हेरिएको छ । तर, उनको क्लब रेकर्ड भने राम्रो छैन् । इंग्लिश क्लब विगानलाई एफए कप जिताएपनि क्लब रेलिगेशनमा परेको थियो । यस्तै एभर्टनमा समेत उनले राम्रो गर्न सकेका थिएनन् ।
यस्तै रियलले टोटेनहमका प्रशिक्षक माउरिसियो पोचेटिनोलाई पनि आफ्नो प्रशिक्षकको लिस्टमा राखेका छन् । पोचेटिनोले पनि इंग्लिश प्रिमियर लिगमा आफुलाई प्रमाणित गरिरहेका छन् । उनले क्लबका युवा खेलाडीलाई अवसर दिंदै उत्कृष्ट नतिजाहरु निकालिरहेका छन् । त्यसैले रियल समेत पोचेटिनोको कामबाट प्रभावित छ ।
तर,रियलका अध्यक्ष फ्लोरेन्टिनो पेरेजले कसलाई क्लबको बागडोर सम्हाल्न दिन्छन् त ? यस बिषय अहिले सबैको चासोको बिषय बनेको छ ।
