विश्व खेलकुद २०२१ का प्रमुख ठूला आकर्षण

एजेन्सी । इस्वी संवत् अनुसार आजदेखि नयाँ वर्ष २०२१ ।

विश्व खेलकुदका लागि वर्ष २०२० धेरै सुखद रहेन्, एक प्रकारले स्तब्ध नै रह्यो, कोरोना भाइरस संक्रमणको महामारीका कारण ।

कोभिड १९ ले जसरी पूरा विश्वलाई कुनै न कुनै ढंगले प्रभावित पारेको थियो, त्यसरी नै विश्व खेलकुद पनि त्यसबाट अछुटो रहेन् ।

अझ सबैभन्दा बढी प्रभावित हुने क्षेत्रमध्ये विश्व खेलकुद पनि एक रहेको छ । यस्तोमा यो क्षेत्रले सन् २०२१ मा अझ बढी आश राख्नेछ, केही बढी राम्रो होस भनेर ।

सन् २०२१ मा हुने ठूला र प्रतीक्षा गर्न लायक खेल महोत्सव के के छन् त ? हाम्रो नजरमा परेका ठूला पाँच प्रतियोगिता यी हुन् ।

युरो २०२०, जुन ११ देखि जुलाई ११

विश्वकपपछि विश्व फुटबलको सबैभन्दा ठूलो प्रतियोगिता कुनै छ भने त्यो पक्कै पनि युरो नै हो । युरोपेली फुटबलको सबैभन्दा ठूलो यो प्रतियोगिता सन् २०२० मा हुनु पर्ने थियो, तर महामारीले सम्भव भएन्, त्यसैले यस वर्ष हुनेछ । अनि नाम भने उही रहनेछ, युरो २०२० ।

यसपल्टको प्रतियोगिता अलिक फरक छ, यो एकै देशमा हुनेछैन्, बरू युरोपका विभिन्न सहरमा हुनेछ । अनि प्रतियोगितामा २४ टिमका सहभागिता रहनेछ र पक्का छ, यसले अब्बल दर्जाको फुटबल पस्कनेछ ।

विम्बल्डन, जुन २८ देखि जुलाई ११

त्यसै पनि विश्व टेनिसका लागि विम्बल्डन भनेपछि सधैं खास रहने गरेको छ । चार ग्रान्ड स्लाममध्ये पनि सबैभन्दा बढी महत्त्व प्रतियोगिता यही हो, घाँसे मैदानमा खेलिने । यसपल्ट यो प्रतियोगिताको अझ बढी प्रतीक्षा किन हुनेछ भने सन् २०२० यो हुन सकेन्, त्यही कोभिड १९ कै कारण ।

विम्बल्डनको इतिहासमा यसरी प्रतियोगिता रोकिएको यो दोस्रो विश्व युद्धपछि पहिलो पल्ट हो । जति बेला विम्बल्डन फेरि सुरु हुनेछ र खेलाडी सेता लुगामा देखिनेछन्, मन मोहक पक्कै हुनेछ ।

द हन्ड्रेड, जुलाई १७ देखि अगस्ट १३

विश्व क्रिकेटले सन् २०२० मै एउटा नयाँ ढाँचाको खेल सन् २०२० मै देख्नु पर्ने थियो, तर त्यस्तो भएन् । केही अन्यौलताबीच यो प्रतियोगिता पनि एक वर्ष पछाडि सारियो ।

प्रतियोगितालाई लिएर खुबै चर्चा परिचर्चा भएको थियो, किनभने टेस्ट, वान डे र ट्वान्टी ट्वान्टीपछि फेरि यो ठ्याक्कै स्वरूपको क्रिकेट थियो, द हन्ड्रेडका रूपमा । जति बेला यो प्रतियोगिता इंग्ल्यान्डमा आयोजना हुनेछ, त्यसले पस्कने क्रिकेटको स्वाद कस्तो हुनेछ, त्यो वास्तवमै हेर्न लायक हुनेछ ।

टोकियो ओलम्पिक, जुलाई २३ देखि अगस्ट ८

सबैलाई थाहा नै छ, टोकियो ओलम्पिक खासमा हुनु पर्ने सन् २०२० मै हो, तर यो हुन सकेन् । आधुनिक ओलम्पिकको इतिहासमा यसरी प्रतियोगिता रद्द भएर एक वर्ष पछाडि सारिएको यो नै पहिलो घटना हो, दुई विश्वयुद्धका बेला प्रतियोगिता नै हुन नसकेको स्थिति बाहेकमा ।

यस्तोमा ओलम्पिक सन् २०२१ मा हुनेछ, तर नाम भने फेरि एकपल्ट उही हुनेछ, टोकियो २०२० । अब जापानले यो ओलम्पिक कसरी गर्छ, त्यो साह्रै हेर्न लायक हुनेछ, धेरै अर्थमा ।

ट्वान्टी ट्वान्टी विश्वकप, अक्टोबर १८ देखि नोभेम्बर १५

यो पनि पछाडि सारिएको प्रतियोगितामै पर्छ, अन्यथा अष्ट्रेलियामा ट्वान्टी ट्वान्टी क्रिकेटको विश्वकप भइसक्थ्यो । आखिरमा प्रतियोगिता सार्ने काम मात्र भएन्, आयोजना स्थल समेत सारियो । वर्ष २०२१ ले ट्वान्टी ट्वान्टी विश्वकप त आयोजना गर्दैछ, तर यो भारतमा हुनेछ ।

सहभागी देशको संख्या १६ हुनेछ । आफ्नै भुमिमा भएपछि भारत बलियो प्रत्यासी त रहने नै छ, उपाधिका लागि । तर ट्वान्टी ट्वान्टी क्रिकेटमा अहिले के हुन्छ, भन्नै सकिन्न ।

- एजेन्सीको सहयोगमा ।