मलेसियालाई एएफसीको कारबाही, एशियन कप छनोटमा नेपालले पायो ३ अंक

काठमाडौं। एसियन फुटबल कन्फेडेरेसन (एएफसी) ले अयोग्य खेलाडी प्रयोग गरेको ठहर गर्दै मलेसिया फुटबल संघ (एफएएम) लाई कारबाही गरेको छ।

एएफसीको अनुशासन तथा आचारसंहिताको धारा ५६ उल्लंघन गरेको आरोपमा मलेसियालाई दुई खेलमा ‘फोर्फिट’ हार दिइएको हो।

एएफसीको निर्णयअनुसार मलेसियाले एएफसी एसियन कप २०२७ छनोट अन्तर्गत खेलेका दुई खेल गुमाएको छ। २५ मार्च २०२५ मा नेपालविरुद्धको खेल र १० जुन २०२५ मा भियतनामविरुद्धको खेल दुवैमा मलेसियालाई ०–३ को हार दिइएको छ।

२५ मार्च २०२५ मा सुल्तान इब्राहिम स्टेडियममा नेपालविरुद्धको २–० को जित र १० जुन २०२५ मा बुकित जलिल राष्ट्रिय रंगशालामा भियतनामविरुद्धको ४–० को जितको नतिजा उल्टिएको हो।

यससँगै मलेसिया फुटबल संघलाई ५० हजार अमेरिकी डलर जरिवाना पनि तोकिएको छ। यो ३० दिनभित्र बुझाउनुपर्नेछ। यी दुई फोर्फिट हारपछि मलेसिया अंकतालिकामा भियतनामभन्दा ६ अंकले पछाडि परेको छ। अब एउटा मात्र खेल बाँकी रहँदा मलेसियाको एसियन कप २०२७ मा छनोट हुने सम्भावना समाप्त भएको छ।

उता, भियतनामले भने उत्कृष्ट प्रदर्शन गर्दै एक खेलअघि नै एएफसी एसियन कप २०२७ को फाइनल चरणमा स्थान सुरक्षित गरेको छ।